जळगाव तालुक्यातील गाढोदा येथील घटना
जळगाव (प्रतिनिधी) : तालुक्यातील गाढोदा येथील तरुण शेतमजूराने सोमवारी दि. ८ एप्रिल रोजी गावातील देवगाव रस्त्यावरील एका शेतात झाडाला गळफास लावून आत्महत्या केल्याची धक्कादायक घटना संध्याकाळी ५ वाजता उघड झाली आहे. याप्रकरणी जळगाव तालुका पोलीस स्टेशनला अकस्मात मृत्यूची नोंद करण्याचे काम सुरु होते.
हर्षल विश्वनाथ चौधरी (वय २६, रा. गाढोदा ता. जळगाव) असे मयत तरुणाचे नाव आहे. तो गावात आई, वडील, दोन काकांसह राहत होता. ट्रॅक्टर चालवून मोलमजुरी करीत तो परिवाराचा उदरनिर्वाह करीत होता. गावात मनमिळावू, होतकरू व गरीब स्वभावाचा म्हणून त्याची ओळख होती. सोमवारी दि. ८ एप्रिल रोजी दुपारी तो शेतात गेलेला होता. दुपारी देवगाव रस्त्यावरील वासुदेव विठ्ठल पाटील यांच्या शेतातील झाडाला त्याने गळफास लावून आत्महत्या केली. संध्याकाळी ५ वाजेच्या सुमारास आजूबाजूच्या ग्रामस्थांना समजताच त्यांनी गावात माहिती दिली.
तसेच, हर्षल याला शासकीय वैद्यकीय महाविद्यालय व रुग्णालयात दाखल केले. तेथे तपासणी करून वैद्यकीय अधिकारी डॉ. निरंजन देशमुख यांनी त्यास मयत घोषित केले. यावेळी कुटुंबीयांनी एकच आक्रोश केला. दरम्यान, हर्षलच्या मृत्यूची वार्ता कळताच गावकऱ्यांनी रुग्णालयात गर्दी केली होती. जळगाव तालुका पोलीस स्टेशनला माहिती मिळताच त्यांनी घटनास्थळी धाव घेतली. पंचनामा करून पोलीस स्टेशनला अकस्मात मृत्यूची नोंद करण्यात आली आहे. दरम्यान, तरुणाच्या आत्महत्येमुळे गाढोदा गावात शोककळा पसरली आहे.
