सावदा, चोपड्यात केला होता गुन्हा : मुद्देमाल जप्त
जळगाव (प्रतिनिधी) : जिल्ह्यात विविध घरफोडीच्या गुन्ह्यात स्थानिक गुन्हे अन्वेषण शाखेचे पथक तपास करीत असतांना त्यांनी एकाला अडावद येथून ताब्यात घेत अटक केली आहे. त्याने रावेर तालुक्यातील सावदा येथे किराणा दुकान व चोपडा शहरात हॉटेलमध्ये चोरी केल्याचे निष्पन्न झाले आहे. त्याच्याकडून मुद्देमाल जप्त करण्यात आला आहे.
स्थानिक गुन्हे अन्वेषण शाखेचे निरीक्षक किसन नजन पाटील यांनी घरफोडीच्या गुन्ह्याबाबत पथक रवाना केले होते. त्यात अडावद शहरात राहणार संशयित अक्षय संजय कोळी (वय २१, रा. इंदिरा नगर, अडावद ह. मु. धानोरा रोड, अडावद ता. चोपडा) याला ताब्यात घेऊन अटक केली आहे. त्याने त्याच्या साथीदारासह सावदा-फैजपूर रोडवर किराणा दुकानात आणि चोपडा शहरातील कारगिल चौकातील हॉटेल भाऊ येथे चोरी केल्याची कबुली दिली आहे.
संशयित अक्षय कोळी याला पुढील कायदेशीर कार्यवाहीसाठी सावदा पोलीस स्टेशन येथे जमा करण्यात आले आहे. तपास पथकात पोहेकॉ संदीप पाटील, प्रविण मांडोळे, कमलाकर बागुल, गोरखनाथ बागुल आदींचा समावेश होता.
