जळगावात गेंदालाल मिल येथील घटना
जळगाव (प्रतिनिधी) :- शहरातील गेंदालाल मिल येथे मुलाने पित्यावर चाकूने हल्ला केल्याची घटना उघडकीस आली आहे. व्यसन करण्यास पैसे दिले नाही याकरिता त्याने हे कृत्य केले. याप्रकरणी शहर पोलीस ठाण्यात गुन्हा दाखल करण्यात आला आहे.
घटना गेंदालाल मिल परिसरात गुरूवार १२ ऑक्टोबर रोजी सकाळी ११ वाजेच्या सुमारास घडली आहे. चालक म्हणून काम करणारे संतोष वामन लिंगायत (५०, रा. गेंदालाल मिल) हे कुटुंबासह राहतात. गुरुवारी त्यांच्याकडे मुलगा महेश संतोष लिंगायत (२३, रा. गेंदालाल मिल) याने व्यसन करण्यासाठी १०० रुपये मागितले. मात्र वडील संतोष लिंगायत यांनी त्याला नकार दिला. त्याचा राग आल्याने महेशने पिता संतोष याच्या छातीवर चाकूने वार करून जखमी केल्याची घटना घडली. जखमी झालेल्या संतोष लिंगायत यांना तातडीने शासकीय वैद्यकीय महाविद्यालय व रुग्णालयात उपचारार्थ दाखल करण्यात आले. याप्रकरणी शहर पोलीस ठाण्यात तक्रार दाखल करण्यात आली आहे. पुढील तपास पोहेकॉ राजकुमार चव्हाण करीत आहेत.
