पुढील सुनावणी १३ ऑक्टोबर रोजी
मुंबई (प्रतिनिधी) – महाराष्ट्रातील आमदारांच्या अपात्रतेबाबत कोठलेही निर्णय न घेतल्यामुळे सुप्रीम कोर्टाने कडक ताशेरे ओढल्यानंतर आता विधानसभा अध्यक्षांनी या मुद्द्यावर सुनावणी सोमवारी सुरु केली. विधानसभाध्यक्ष अॅड. राहुल नार्वेकर यांच्या अध्यक्षतेखाली विधिमंडळातील मध्यवर्ती सभागृहामध्ये दुपारी ३ वाजता ही सुनावणी झाली. या सुनावणीसाठी ठाकरे गटाच्या १४, तर शिंदे गटाच्या ३९ आमदारांना नोटीस पाठवण्यात आली होती. आजच्या सुनावणीदरम्यान विधानसभा अध्यक्षांनी दोन्ही गटाच्या आमदारांची बाजू ऐकून घेतली. त्यानंतर पुढील सुनावणी १३ ऑक्टोबर रोजी घेण्याचे निश्चित करण्यात आले आहे.
विधानसभा अध्यक्षांकडे दाखल करण्यात आलेल्या विविध याचिकांवर एकत्र सुनावणी घेण्यात यावी, अशी मागणी ठाकरे गटाकडून आज करण्यात आली. मात्र या मागणीला मुख्यमंत्री एकनाथ शिंदे यांच्या नेतृत्वाखालील शिवसेनेकडून विरोध करण्यात आला. दरम्यान, आमदार अपात्रतेचा निकाल यावर्षी लागणं कठीण असल्याचं बोललं जात आहे. कारण कागदपत्रं तपासणी आणि विविध नेत्यांच्या साक्षीसाठी तीन महिन्यांचा कालावधी लागण्याची शक्यता आहे. तसंच १३ ऑक्टोबर रोजी पुढील सुनावणी झाल्यानंतर पुन्हा हिवाळी अधिवेशन असल्याने डिसेंबरमध्ये सुनावणी घेणं शक्य नाही. परिणामी आमदार अपात्रतेचा निकाल लागण्यास विलंब होण्याची शक्यता आहे.