जळगावात मेहरूण ट्रॅकवर घडली होती घटना
जळगाव (प्रतिनिधी) – मेहरूण तलावाच्या परिसरात एका तरुणाला अपघात करून लुटणाऱ्या संशयितांपैकी दोघांच्या एमआयडीसी पोलीस स्टेशनच्या कर्मचाऱ्यांनी मुसक्या आवळल्या आहेत. त्यांना न्यायालयात हजर केले असता त्यांना चार दिवसांची पोलिस कोठडी सुनावण्यात आली.
मंगळवारी १५ ऑगस्ट रोजी सायंकाळी तारीक अलताफ खाटीक (२३, रा. गुलाब बाबा कॉलनी) हे त्यांच्या दुचाकीने मेहरुण ट्रॅकवर जात असताना दुचाकीने (एमएच १९, डीयू ४६१०) धडक दिली होती. अपघात करणाऱ्या व त्यांच्या सोबत दुचाकीवर असलेल्या एकूण चार जणांनी तारीक खाटीक यांना अपघाताच्या कारणावरुन मारहाण केली. तसेच, २५ हजार रुपये किमतीचा मोबाईल, ५०० रुपये किमतीचे ब्ल्यू टुथ, एक हजार रुपये किमतीचे मनगटी घड्याळ व रोख ६०० रुपये असा एकूण २७ हजार १०० रुपये किमतीचा ऐवज बळजबरीने घेऊन पळून गेले होते. या प्रकरणी चार जणांविरुध्द गुन्हा दाखल करण्यात आला होता.
एमआयडीसी पोलिस ठाण्याचे पोलिस निरीक्षक जयपाल हिरे यांना हा गुन्हा रामेश्वर कॉलनी परिसरातील काही तरुणांनी केला असल्याची माहिती मिळाली. त्यानुसार राहुल नाना राजपूत (२३) रितेश भिकन चौधरी (१८, दोन्ही रा. रामेश्वर कॉलनी) यांना ताब्यात घेतले. त्यांनी सदरचा गुन्हा केल्याचे कबुल केले. त्यांच्याकडून गुन्ह्यात वापरलेली दुचाकी, मोबाईल जप्त करण्यात आला. या दोघांसोबत असलेले दोन जण फरार असून त्यांचा शोध सुरु आहे.
सदरची कारवाई पोलिस निरीक्षक जयपाल हिरे यांच्या मार्गदर्शनाखाली पोलिस उप निरीक्षक रवींद्र गिरासे, सहायक फौजदार अतुल वंजारी, पोहेकॉ इम्रान बेग, सचिन मुंढे, रामकृष्ण पाटील, इम्रान सैय्यद , सुधीर साळवे, किशोर पाटील, राहुल रगडे, विशाल कोळी यांनी केली. दोघांना न्यायालयात हजर केले असता न्या. सुवर्णा कुलकर्णी यांनी चार दिवसाची पोलिस कोठडी सुनावली.
