जळगाव जिल्हा न्यायालयाचा निकाल
जळगाव (प्रतिनिधी) – शहरातील हिराशिवा पार्क येथे राहणाऱ्या दारुड्या पित्याने कौटुंबिक वाद आणि दारू पिण्याच्या व्यसनातून पोटच्या मुलीचा तीन वर्षांपूर्वी बांभोरी पुलाखाली खून केला होता. या गुन्ह्यात या पित्याला जळगाव जिल्हा व सत्र न्यायालयाने गुरूवारी १० ऑगस्ट रोजी दुपारी आजन्म कारावासी शिक्षा सुनावली आहे.
संदीप यादव चौधरी (वय-३६) असे शिक्षा झालेल्या आरोपीचे नाव आहे. संदीप चौधरी हा पत्नी नयना आणि मयत मुलगी कोमल चौधरी (वय-७) यांच्यासह राहत होता. संदीप चौधरी याला दारू पिण्याचे व्यसन होते. सतत दारूच्या नशेत राहत होता. ८ जानेवारी २०२० रोजी सकाळी दारू पिण्यावरून पत्नी नयना चौधरी यांना त्याने मारहाण केली होती. त्यावेळी, मम्मीला मारू नका, असे मुलगी कोमलने वडील संदीपला सांगितले होते. हा राग संदीपच्या मनात होता.
८ जानेवारी रोजी दुपारी ४ वाजता नयना चौधरी यांनी मुलगी कोमल हिला शिकवणीला सोडले. त्यानंतर संदीप चौधरी हा शिकवणीतून चिमुकलीला परस्पर सोबत घेवून गेला. जळगाव शहरानजीक बांभोरी पुलाच्या खाली तिचा खून केला. याप्रकरणी जळगाव तालुका पोलीस ठाण्यात खुनाचा गुन्हा दाखल करण्यात आला. हा खटला जळगाव जिल्हा न्यायालयाचे न्यायमुर्ती शेख यांच्या न्यायालयात चालविण्यात आला. यात सरकार पक्षातर्फे एकुण १२ साक्षिदार तपासण्यात आले. साक्षिदार आणि सादर केलेल्या पुराव्या आधारे न्यायमुर्ती शेख यांनी आरोपी संदीप चौधरी याला दोषी ठावून आजन्म कारावास आणि ५ हजाराचा दंड अशी शिक्षा सुनावली आहे. सरकार पक्षातर्फे जिल्हा सरकारी वकील ॲड.सुरेंद्र काबरा यांनी काम पाहिले.
