जळगाव (प्रतिनिधी) – पक्षाच्या नेत्यांचे आदेश न ऐकणे, पक्षविरोधात कारवाया करणे यासाठी राष्ट्रवादी काँग्रेस पक्षाच्या कार्यकर्त्यांच्या मागणीनुसार “वेटिंग”वर असलेले नेते संजय पवार अखेर बडतर्फ झाले आहे. सतत पक्षविरोधी कारवाया केल्यामुळे जिल्हा मध्यवर्ती सहकारी बँकेचे अध्यक्ष संजय मुरलीधर पवार यांना बडतर्फे करीत असल्याची माहिती पक्षाचे सरचिटणीस शिवाजी गर्जे यांनी १६ मे रोजी काढलेल्या पत्राद्वारे हि माहिती दिली आहे.
धरणगाव कृषि उत्पन्न बाजार समिती ता. धरणगाव, जिल्हा जळगाव सार्वत्रिक निवडणूक २०२३- २०२८ मध्ये पक्षाच्या कोणत्याही पदावर नसताना शिवसेना-भाजप-राष्ट्रवादी प्रणित सहकार पॅनलच्या वतीने निवडणूक लढवित आहात असे बॅनर्स, पोस्टर्स संजय पवार यांनी लावलेले होते. यामध्ये राष्ट्रवादी कॉंग्रेस पार्टी – संजय पवार गट अशा प्रकारचा उल्लेख करून पक्षाचे नाव, चिन्ह, नेत्यांचे फोटो लावून पदाधिकारी, कार्यकर्त्यांमध्ये संभ्रम निर्माण केलेला होता. राष्ट्रवादी काँग्रेस पक्षामध्ये अशा प्रकारचा कोणताही गट नाही. सदरील बॅनर्स, पोस्टर्स तातडीने काढून टाकण्यात यावेत अशी सूचना दि. २१ एप्रिल रोजीच्या पत्रान्वये संजय पवार यांना करण्यात आली होती. सूचनेनुसार कोणतीही कार्यवाही केलेली नाही तसेच याबाबतचा लेखी खुलासा देखील कार्यालयास पाठविण्याची तसदी पवार यांनी घेतलेली नाही.
पक्षविरोधी कृत्य करू नये अशा वारंवार सूचना देऊनही संजय पवार राष्ट्रवादी काँग्रेस पक्षाच्या विरुद्ध कारवाया करून पक्षाच्या पदाधिकारी व कार्यकर्त्यांमध्ये गैरसमज पसरविण्याचे कृत्य करत असल्याचे निदर्शनास आले आहे. सबब त्यांना आज दि. १६ मे पासून पक्षातून बडतर्फ करण्यात आले आहे.तरी यापुढे राष्ट्रवादी कॉंग्रेस पक्षाचे नाव, चिन्ह, नेत्यांचे फोटो वापरू नयेत. तसे केल्यास आपल्यावर पुढील योग्य ती कायदेशीर कार्यवाही करण्यात येईल अशी तंबी संजय पवार यांना पत्रातून देण्यात आली आहे.
संजय पवार यांनी बुधवारी देखील मंत्री गिरीश महाजन यांना वाढदिवसाच्या शुभेच्छा देतांना चक्क शरद पवार व अजित पवार यांचा फोटोंचा वापर केला होता. त्यामुळे ते दिवसभर चर्चेत होते. संजय पवार यांच्या कारवाईबाबत पक्षाचे जिल्हाध्यक्ष रवींद्र पाटील यांनी, हा सर्वसामान्य कार्यकर्त्यांचा विजय आहे. पक्षश्रेष्ठींचे जाहीर आभार मानतो, असे सांगितले. तर, माझ्या कुटुंबाने राष्ट्रवादी काँग्रेस पक्षाची सेवा केली आहे. बडतर्फ कारवाईबाबत सविस्तर बोलेन अशी सूचक प्रतिक्रिया संजय पवार यांनी “केसरीराज” शी बोलताना दिली.
