मुक्ताईनगर ( प्रतिनिधी ) – मुक्ताईनगर तालुक्यातील लोहारखेडा येथे दुचाकीत पेट्रोल भरण्याच्या कारणावरून पतीकडून -पत्नीला बेदम मारहाण केल्याची घटना घडली आहे. याबाबत मुक्ताईनगर पोलिस स्टेशनला पतीवर गुन्हा दाखल करण्यात आला आहे.
याबाबत सविस्तर माहिती अशी की, अनिता शांताराम वाघ ( रा. लोहारखेडा ता. मुक्ताईनगर ) हे पती शांताराम फकीरा वाघ यांच्या सोबत राहायला आहे. १३ नोव्हेंबर रोजी दुपारी ३ वाजता त्यांच्या दुचाकीतील पेट्रोल संपल्याने पेट्रोल घेऊन या असे सांगितल्याचा राग आल्याने पती शांताराम फकिरा वाघ याने पत्नी अनिता वाघ यांना चापटाबुक्क्यांनी मारहाण करून डाव्या हाताला गंभीर दुखापत केली. यासंदर्भात पत्नी अनिता वाघ यांनी मुक्ताईनगर पोलीस स्टेशनला पतीविरोधात दिलेल्या तक्रारीवरून पती शांताराम वाघ यांच्या विरोधात गुन्हा दाखल करण्यात आला आहे. पुढील तपास पोलीस हेडकॉन्स्टेबल संतोष चौधरी करीत आहे.
