जळगाव ( प्रतिनिधी ) – शिरसोली ते दापोरा दरम्यान धावत्या रेल्वेतून पडून परप्रांतीय तरूणाचा जागीची मृत्यू झाल्याची घटना बुधवारी घडली आहे. याप्रकरणी तालुका पोलिस स्टेशनला अकस्मात मृत्यूची नोंद करण्यात आली आहे.
याबाबत सूत्रांनी दिलेली माहिती अशी की, मुंबईतील गोवंडी भागातील शिवाजी नगर परिसरात संतोष घनश्याम राजभर ( वय – ३५, रा. उत्तप्रदेश ) हा तरुण राहायला होता. उत्तरप्रदेश येथे आपल्या मूळगावी जाण्यासाठी मुंबईहून बसला होता. दरम्यान, रेल्वेने प्रवास करत असतांना शिरसोली ते दापोरा दरम्यान अपलाईनवरील खांबा क्रमांक ४१३/१२ ते १४ दरम्यान, जाणता राजा शाळेजवळ रेल्वेतून खाली पडल्याने त्यांचा जागीच मृत्यू झाला.
शिरसोली स्टेशनप्रबंधकांनी घटनेबाबत तात्काळ तालुका पोलिसांना माहिती दिली. त्यानुसार पोलीस उपनिरीक्षक नयन पाटील, संजय भालेराव, अनिल मोरे, अनिल फेगडे व उमेश ठाकूर यांनी घटनास्थळी गेले. दरम्यान, मयत तरुणाची झडती घेतली असता त्याच्या खिशात आधारकार्ड मिळून आले. त्यावरुन त्या तरुणाची ओळख पटली. याप्रकरणी स्टेशन प्रबंधकाच्या माहितीवरुन तालुका पोलिसात अकस्मात मृत्यूची नोंद करण्यात आली आहे. आधारकार्डवरुन तरुणाची ओळख पटल्यानंतर तात्काळ तरुणाच्या कुटुंबियांशी पोलिसांनी संपर्क करुन घटनेची माहिती दिली. त्यानुसार त्याचे कुटुंबिय मुंबई येथून जळगावला येण्यासाठी निघाले आहे.
