पाचोरा ( प्रतिनिधी ) – पाचोरा येथील युवकाचा वालझिरी येथील नदीपात्रात पाय घसरून पडल्याने पाण्यात बुडून मृत्यू झाल्याची घटना गुरुवारी घडली आहे.
याबाबत अधिक माहिती अशी की, शहरातील श्रीराम नगर, सिंधी काॅलनी, जामनेर रोड, पाचोरा येथील रहिवाशी राहुल सुरेश चौधरी (वय – १७) हा युवक दि. २७ ऑक्टोबर रोजी भाऊबीजेसाठी आपल्या बहिणीकडे गेला होता. आपल्या बहिणीचे आशीर्वाद घेत मोठ्या उत्साहात भाऊबीज हा पवित्र सण साजरा करण्यात आला. दरम्यान दि. २७ रोजी दुपारी १२ : ३० वाजेच्या सुमारास राहुल हा वालझिरी (चाळीसगाव) येथे आयोजित नवसाच्या कार्यक्रमात सहभागी झाला होता. दरम्यान, नदीपात्राजवळ हात – पाय धुण्यासाठी गेला असता अचानक राहुल याचा पाय घसरून तो थेट खोल पाण्यात पडला. सदरचा प्रकार त्याचे सोबत असलेल्या चिमुकल्यांनी परिवारातील सदस्यांना सांगितला असता तात्काळ उपस्थितांच्या मदतीने राहुल यास पाण्यातुन बाहेर काढण्यात आले व लागलीच चाळीसगाव येथील ग्रामीण रुग्णालयात दाखल करण्यात आले. यावेळी वैद्यकीय अधिकारी यांनी राहुल यास मृत घोषित करताच कुटुबिंयांनी एकच हंबरडा फोडला. राहुल चौधरी याचे पश्चात आई, बहिण, पाहुणे असा परिवार आहे.
