“एकनाथ शिंदे आमचे गटनेते, त्यांच्या आदेशाप्रमाणे वागत आहोत” आ. किशोर पाटील यांची पहिली प्रतिक्रिया
जळगाव (प्रतिनिधी) : महाराष्ट्राच्या राजकीय भूकंपात जळगाव जिल्ह्यातील तीन आमदार हे एकनाथ शिंदे यांच्या गटासोबत आहेत. गुजरातेतील सुरतच्या विमानतळावरून गुवाहाटीला जाताना तीनही आमदार दिसून आले आहेत. या तीनही आमदारांनी माध्यमांशी बोलण्यास नकार दिला. आमचे गटनेते एकनाथ शिंदे आहेत. त्यांच्या सोबतच आम्ही आहोत, एवढेच पाचोरा येथील आ. किशोर पाटील यांनी सांगितले आहे.
बीबीसी वृत्तवाहिनीने याबाबत बातमी दाखवली आहे. सकाळी एकनाथ शिंदे यांच्यासोबत शिवसेनेचे ३३ आमदार व २ अपक्ष बच्चू कडू व नरेंद्र भोंडेकर आहे. हे सर्व विमानतळावर बसमधून उतरताना दिसत आहेत. त्यांच्याशी माध्यमांनी चर्चा करण्याचा प्रयत्न केला असता गुजरात पोलिसांनी मात्र असहकार्य केले आहे.
या ठिकाणी पाचोर्‍याचे आ.किशोर पाटील यांना विचारले असता, एकनाथ शिंदे आमचे गटनेते आहेत. त्यांनी आम्हाला बोलवले. आम्ही त्यांच्या आदेशाप्रमाणे वागत आहोत. आमची कुठलीच नाराजी नाही, एवढेच ते म्हणत आहेत त एरंडोल-पारोळा मतदार संघाचेआ.चिमणराव पाटील आणि चोपडा मतदार संघाचे आ. लताताई सोनवणे मात्र माध्यमांशी काहीही न बोलता निघून गेले.
महाराष्ट्राच्या राजकीय भूकंपामध्ये तसेच भविष्यात होणाऱ्या बदलांमध्ये जळगावचे तीन आमदार सहभागी असल्याचे स्पष्ट झाले असून त्यांच्या भवितव्याविषयी देखील आता उत्सुकता लागून राहिली आहे. यावेळी माध्यमांशी बोलताना एकनाथ शिंदे म्हणाले की, बाळासाहेबांनी व धर्मवीर आनंद दिघे यांनी आम्हाला हिंदूत्वाची शिकवण दिली आहे. कडवट हिंदुत्व आम्हाला अपेक्षित आहे आणि आम्ही त्याच वाटेवर जात आहोत, एवढीच सावध प्रतिक्रिया आ.शिंदे यांनी दिली आहे.
