पाचोरा ( प्रतिनिधी ) – पाचोरा ग्रामीण रुग्णालयात सिझर बाळंतपणासाठी 2500 लाच न दिल्याने या रुग्णालयातील कर्मचाऱ्यांनी संगनमताने नवजात बाळाला अनैसर्गिक मारहाण करून ठार भारल्याचा आरोप होत आहे . या घटनेची चौकशी आणि दोषींवर कारवाईसाठी बल्लाळेश्वर युवा फाउंडेशनने आंदोलनाचा इशारा दिला आहे .
बल्लाळेश्वर युवा फाउंडेशनने जिल्हाधिकारी , जिल्हा आरोग्य अधिकारी , पोलीस निरीक्षक, तहसीलदार व जिल्हा शल्य चिकित्सकांना दिलेल्या निवेदनात म्हटले आहे की , पाचोरा ग्रामीण रुग्णालयात १० मेरोजी सकाळी सोनु कुमार ( रा. पाचोरा ) यांनी त्यांच्या पत्नीला प्रसुती साठी दाखल केले. त्या महिलेची त्याच दिवशी संध्याकाळी सिझर करून प्रसुती करण्यात आली. महिलेने ३:२५ किलो वजनाच्या बाळाला जन्म दिला. महिलेची तसेच जन्मलेल्या बाळाची प्रकृती ठिक होती. मात्र महिलेच्या पतीने सिझरसाठी २५०० रुपये रोख उपस्थित डॉक्टर व सिस्टर यांना देण्यास नकार दिल्याने डॉक्टर आणि सिस्टर यांचा संताप अनावर झाल्यामुळे त्यांनी त्यांचा राग नुकत्याच जन्मलेल्या बाळावर काढून बाळाला जबर मारहाण केली. त्यामुळे बाळाला मोठ्या प्रमाणात दुखापत होवुन त्याची प्राणज्योत मालवली.
त्यावेळी बालरोग तज्ञ डॉक्टर अनुपस्थित असतांना प्रसुतीतज्ञ सिस्टर यांनी बाळाला कोणत्या वैद्यकीय पदवी नुसार मारहाण केली.? असा सवाल विचारला जात आहे.
सोनू कुमार यांनी १ १मे रोजी पाचोरा पोलिस ठाण्यात तक्रार दाखल केली पोलसांनी गंभीर दखल घेवून सदर घटनेचा अधिकाऱ्यांसमक्ष पंचनामा व मयत बाळाचे इन कॅमेरा शवविच्छेदन जळगाव येथे करण्यात आले . त्या बाळाच्या आईला पुढील उपचारांसाठी जळगावच्या जिल्हा शासकीय वैद्यकीय महाविद्यालय रुग्णालयात दाखल करण्यात आले आहे.
संबंधित दोषी स्त्री रोग तज, बालरोगतज्ज्ञ, सिस्टर यांचेवर निलंबनाची कारवाई करुन पोलिसांत गुन्हा दाखल करण्यात यावा पाचोरा ग्रामीण रुग्णालयातील कर्मचाऱ्यांच्या नातेवाइकांची सतत दारुच्या नशेत वर्दळ असते. त्या नातेवाईकांवर सि.सि.टी.व्हि. फुटेज नुसार गुन्हा दाखल करावा , अशी मागणी बल्लाळेश्वर फाउंडेशनने केली आहे.
पाचोरा ग्रामीण रुग्णालयात पैशाची मागणी करणाऱ्या कर्मचाऱ्यांना जाब विचारला तेव्हा डॉक्टर , सिस्टर, कर्मचारी यांनी स्पष्ट सांगितले की,आम्हाला आमच्या वरिष्ठांना दरमहा हसा पुरवावा लागतो ! त्यामुळे लाच मागणारांची सखोल चौकशी करण्यात यावी अन्यथा बल्लाळेश्वर युवा फाऊंडेशन तर्फे पाचोरा तहसील कार्यालयासमोर आमरण उपोषण व आंदोलन करण्यात येईल असा इशारा देण्यात आला आहे.
