पाचोरा ( प्रतिनिधी ) – पाचोरा तालुक्यातील वरखेडीजवळील सरकारी दवाखान्यासमोर भरधाव ट्रकने मोटारसायकलला धडक दिल्याने पिंपळगाव येथील मोटारसायकल्सवर जागीच ठार झाला . हा अपघात शनिवारी दुपारी घडला.
.भंगलाल गोविंदा राठोड असे मयताचे नाव आहे. पिंपळगाव हरेश्वरकडून मोसंबीने भरलेला ट्रक (क्रमांक एच. पी. 17 यु. 7285) ट्रकचालक महेंदरसिंग रघुवीरसिंग पाचोरा शहराकडे शनिवारी दुपारी घेऊन जात होता वरखेडी बसस्थानकाकडून वरसाडे येथील रहिवाशी व ग्रामविकास मंडळाचे माजी संचालक तथा वरसाडा तांड्याचे नाईक भंगलाल राठोड त्यांच्या मोटारसायकल (एम.एच.20 ए.जे. 5000) वरून पिंपळगाव हरेश्वरकडे जात असतांनाच वरखेडी येथील शासकीय रुग्णालयासमोर ट्रक व मोटारसायकलची धडक झाल्यामुळे भंगलाल राठोड जागीच ठार झाले.
ही घटना घडताच वरखेडी येथील ग्रामपंचायत सदस्य, भाजयुमो उपाध्यक्ष योगेश चौधरी, शशिकांत पाटील (राजुरी), दिनेश पाटील (शिंदाड), गोरख जाधव, समाधान भोई यांनी घटनास्थळी मदतकार्य केले. रुग्णवाहिका आणण्यात आली, परंतु तोपर्यंत भंगलाल राठोड यांची प्राणज्योत मालवली होती.
अपघाताची माहिती पिंपळगाव (हरेश्वर) पोलिसांना मिळताच सहाय्यक पोलीस निरीक्षक महेंद्र वाघमारे यांनी पोहेकॉ रणजित पाटील व सहकार्यांना पाठवून अपघातात मयत मोटारसायकलस्वाराचा मृतदेह पाचोरा नगरपालिकेच्या दवाखान्यात पाठवला. पोलिसांनी अपघातग्रस्त ट्रक व चालकाला ताब्यात घेतले आहे.पुढील तपास पो हे कॉ रामकृष्ण पाटील करीत आहेत.
