शिरसोली रेल्वेस्टेशन जवळील घटना
शिरसोली ता. जळगाव (प्रतिनिधी ) – तालुक्यातील दापोरा येथील ३० वर्षीय युवकाने स्वतःला रेल्वेखाली झोकून देत आत्महत्या केल्याची घटना आज सायंकाळी साडेसहा वाजेच्या सुमारास शिरसोली रेल्वेस्टेशन जवळ घडली. या घटनेमुळे परिसरात खळबळ उडाली असून हळहळ व्यक्त होत आहे. दरम्यान युवकाच्या आत्महत्येचे कारण स्पष्ट नसले तरी डोक्यावर कर्ज असल्याच्या कारणावरून त्याने आत्महत्या करण्याचे टोकाचे पाऊल उचलले असल्याचा अंदाज वर्तविण्यात येत आहे . विनोद सखाराम पाटील वय ३० रा. दापोरा ता. जि. जळगाव असे मयत युवकाचे नाव असून तो अविवाहित असून आपल्या आई व भाऊसोबत राहतो.
सूत्रांनी दिलेली माहिती अशी कि, आज सायंकाळी शिरसोली स्टेशन जवळून काही अंतरावर खांबा क्रमांक ४०६/२७ ते ४०७/१ दरम्यान युवकाने डाऊनलाईनवर जाणा-या मालगाडी समोर स्वताला झोकून देत आत्महत्या केली. दापोरा येथील पोलीस पाटील जितेंद्र गवंदे यांना खबर मिळाल्यावरून त्यांनी घटनास्थळी धाव घेतली. तसेच याबाबत तालुका पोलीस ठाण्यात खबर दिल्यावर पोलिसांनी घटनास्थळी येत पंचनामा करून मृतदेह शवविच्छेदनासाठी पाठविला. याबाबत तालुका पोलीस स्टेशनला नोंद करण्यात आली असून पुढील तपास तालुका पोलीस करीत आहे.