पाचोरा (प्रतिनिधी)
भरधाव ट्रकने दुचाकीला दिलेल्या धडकेत १७ वर्षीय तरुण जागीच ठार झाल्याची घटना आज सकाळी घडली असून एक जण गंभीर जखमी झाला.
भडगाव आय.टी.आय. जवळ भरधाव ट्रकने मोटरसायकलला धडक दिल्याने झालेल्या भीषण अपघातात मनोज अजबसिंग पाटील (वय – १७ वर्षे) रा. नाचनखेडा येथील (ह. मु. जयकिसान कॉलनी) याचा दुर्दैवी मृत्यू झाला तर त्याच्या सोबत असलेला दुचाकीस्वार गंभीर जखमी झाला आहे. मनोज भडगाव औद्योगिक प्रशिक्षण संस्थेचा विद्यार्थी होता. सकाळी पाचोरा येथून आय.टी.आय. ला जात असतांना ही घटना घडली. नाचनखेडा येथील शेतकरी कुंटूंबातील मनोज शिक्षणासाठी पाचो-याला काकांकडे रहात होता. शिवाय फावल्या वेळेत कॉलेज चौकातील पुर्ति शॉपजवळ दुध विक्रीचे काम करायचा. अतिशय मनमिळावू व शांत स्वभावाच्या मनोजच्या निधनाने परिसरात हळहळ व्यक्त होत आहे.
