भुसावळात एकाच कुटुंबातील चौघांचा आत्महत्येचा प्रयत्न
जळगाव (प्रतिनिधी) – भुसावळ शहरातील वांजोळा रोडवरील रिक्षाचालकाच्या कुटुंबातील चारही सदस्यांनी विष प्राशन करीत आत्महत्येचा प्रयत्न केल्याची घटना शुक्रवारी रात्री घडली होती. यातील कुटुंबप्रमुखाचा आज शासकीय वैद्यकीय महाविद्यालय रुग्णालयात उपचार सुरू असताना म्रुत्यु झाला .
भुसावळ बाजारपेठ पोलिसांनी अत्यवस्थ सदस्यांना तातडीने रुग्णालयात हलवले. दरम्यान, एकाच कुटुंबातील चौघांनी मृत्यूला कवटाळण्याचा प्रयत्न केल्याचे ठोस कारण अद्याप कळू शकले नसले तरी आर्थिक विवंचनेतून त्यांनी हे टोकाचे पाऊल उचलले.
भुसावळ शहरातील वांजोळा रोडवरील प्रेरणा नगरामागे गोकुळधाम रेसीडेन्सीत रिक्षाचालक विलास पंडित भोळे ( वय ६२ ) हे पत्नी व दोन मुलांसह वास्तव्यास होते या कुटुंबातील चारही सदस्यांनी शुक्रवारी रात्री विषारी औषध सेवन करून आत्महत्येचा प्रयत्न केला. हा प्रकार रात्री उशिरा गल्लीतील नागरीकांना कळताच त्यांनी पोलिसांना माहिती कळवली. पोलिस उपअधीक्षक सोमनाथ वाघचौरे यांच्यासह बाजारपेठ पोलिस ठाण्याचे स पो नि गणेश धुमाळ व कर्मचार्‍यांनी चारही सदस्यांना रुग्णालयात दाखल केले. विलास प्रदीप भोळे (६२), लताबाई विलास भोळे (५३), प्रेरणा विलास भोळे (२८), चेतन विलास भोळे (२७) सर्व रा.वांजोळा रोड, प्रेरणा नगर) यांच्यावर जळगाव शासकीय वैद्यकीय महाविद्यालय रुग्णालयात उपचार सुरु होते.
आज सकाळी ७ वाजता विलास भोळे यांचा उपचार सुरु असताना मृत्यू झाला. भुसावळच्या बाजारपेठ पोलिस ठाण्यात अकस्मात म्रुत्युची नोद केली जाणार आहे. आधी या सर्वांना खाजगी रुग्णालयात दाखल करण्यात आले होते.
