जळगाव ( प्रतिनिधी ) – जुना आसोदारोड , गोपाळपूरा भागातील रहिवाशी २७ वर्षीय तरूणाने घरात कुणी नसतांना गळफासाने आत्महत्या केल्याची घटना रविवारी दुपारी घडली. पत्नी व सासरच्या मंडळींकडून होणार छळ असह्य झाल्याने आत्महत्या करत असल्याचे सुसाईड नोटमध्ये त्याने नमूद केले आहे. शनीपेठ पोलीसात अकस्मात मृत्यूची नोंद करण्यात आली .
पंकज उखर्डू खाचने (वय-२७ , आसोदा रोड, गोपाळपूरा ) आई व पत्नी, मुलांसह वास्तव्याला आहे. तो वेल्डिंग कारागीर होता . पंकजची पत्नी दिवाळीनिमित्त मुलासह माहेरी गेल्या. त्यामुळे पंकज आणि त्याची आई कल्पना खाचने हे दोघे घरी होते. रविवारी सकाळी पंकजची आई बळीरामपेठेत भाजीपाला विक्रीसाठी गेल्या होत्या . त्यावेळी पंकज घरी एकटाच होता. पंकजने घराचा दरवाजा आतून बंद करून गळफास घेवून आत्महत्या केली. आई दुपारी घरी आल्या तेव्हा दरवाजा आतून बंद होता. शेजारच्यांच्या मदतीने दरवाजा उघडला असता पंकजने गळफास घेतल्याचे दिसून आले. मुलाने गळफास घेतल्याचे पाहून आईने हंबरडा फोडला यावेळी शनीपेठ पोलीसांनी धाव घेवून मृतदेह खाली उतरवून जिल्हा शासकीय वैद्यकीय महाविद्यालयात आणला.
आत्महत्या करण्यापुर्वी पंकज खाचनेने दिड पानाची सुसाईड नोट लिहिली होती. यात पत्नी, शालक, पोलीस असलेले सासरे व सासू यांच्या छळाला कंटाळून मी आत्महत्या करीत असल्याचे नमूद आहे. सुसाईड नोट पोलीसांनी ताब्यात घेतली आहे. शनीपेठ पोलीस ठाण्यात अकस्मात मृत्यूची नोंद करण्यात आली आहे.
