जळगाव ( प्रतिनिधी ) – जिल्हा बँक संचालक मंडळाच्या निवडणुकीत रावेर तालुका सोसायटी मतदारसंघातून राष्ट्रवादी कॉंग्रेसचे नेते अरूण पाटील यांना राजीव पाटील यांनी जाहीर पाठींबा दिला आज राजीव पाटील यांनी त्यांना जाहीर पाठींब्याचे पत्र दिल्याने त्यांची बिनविरोध निवड निश्चित झाली आहे
जिल्हा बँक निवडणुकीच्या रिंगणात यावल आणि रावेरच्या जागेबाबत बराच काथ्याकुट झाला महाविकास आघाडीने जनाबाई गोंडू पाटील यांना कॉंग्रेसच्या कोट्यातून उमेदवारी जाहीर केली. कॉंग्रेसचेच राजीव पाटील आणि राष्ट्रवादी कॉंग्रेसचे माजी आमदार अरूण पाटील यांनीदेखील उमेदवारी अर्ज कायम ठेवले. अरूण पाटील यांना थेट भाजपनेच पुरस्कृत केल्याने राजकीय वर्तुळात चर्चेला उधाण आले होते .
माघारीची मुदत उलटून गेल्यानंतर जनाबाई महाजन यांनी दोन दिवसांपूर्वीच अरूण पाटील यांना पाठींबा दिल्याने खळबळ उडाली. आज दुसरे उमेदवार राजीव पाटील यांनीदेखील अरूण पाटलांना पाठींब्याचे पत्र दिले यामुळे रावेर तालुका सोसायटी मतदारसंघातून अरूण पाटील यांनी बिनविरोध निवड निश्चीत झाली आहे.
आज पत्रकार परिषदेत अरूण पाटील आणि राजीव पाटील यांच्यासह जिल्हा बँक संचालक संजय पवार यांची उपस्थिती होती. राजीव पाटील यांनी माघारीची भूमिका स्पष्ट केली. अरूण पाटील म्हणाले की, आपण दोनचा आमदार होतो. सहकारातही अनेक पदे भूषविली आहेत. २००५ साली जिल्हा बँक संचालक म्हणून काम करण्याची संधी मिळाली. २००८ साली मला जिल्हा बँक निवडणुकीत फक्त चार मतांनी पराभव स्वीकारावा लागला. गेल्या एक वर्षापासून तयारी करत आहोत. मात्र महाविकास आघाडी पॅनलमध्ये स्थान मिळण्यात अडचणी आल्या. आधी जनाबाई महाजन आणि नंतर राजीव पाटील यांनी माघार घेतल्यामुळे आपला विजय निश्चीत झाला आहे.
