मुंबई ( वृत्तसंस्था ) – मुंबईचे माजी पोलीस आयुक्त परमबीर सिंग काही दिवसांपासून बेपत्ता आहेत. ते कोठे गेले हे खुद्द यंत्रणांनासुद्धा माहीत नाही त्यांच्या विरोधात ठाणे, मुंबई गुन्हे शाखेकडे गुन्हे दाखल आहेत. सिंग यांच्याविरोधात अदखलपात्र अटक वॉरंट जारी करण्यात आले आता त्यांचे वेतन रोखण्यात आले आहे. दरम्यान, सिंग यांची संपत्ती जप्त केली जाऊ शकते, असे तपास अधिकारी रमेश महाले यांनी सांगितले.
परमबीर सिंग नेपाळला गेल्याचा दावा करण्यात येत होता.काँग्रेस नेते संजय निरुपम यांनी नेपाळमार्गे परमबीर सिंग बेल्जिअमला गेल्याचा दावा केला. त्या संदर्भात महाले म्हणाले की, निरुपम यांनी केलेला दावा खरा असेल तर सिंग यांच्या बेल्जिअम येथील पत्त्यावर नोटीस पाठवली जाऊ शकते. या पूर्वी अशा नोटीस पाठवल्या आहेत. २६/११ च्या दहशतवादी हल्ल्यात ५ आरोपींना पाकिस्तानच्या पत्त्यावर नोटीस पाठवली होती. इंटरपोलच्या माध्यमातून ही नोटीस पाठवण्यात आली. परंतु पाकने आम्हाला काहीच मदत केली नाही. दाऊद, राजन यांनाही परदेशात वॉरंट पाठवलं होतं, असंही महाले यांनी सांगितले.
सीबीआय ही भारताची नोडल एजन्सी म्हणून इंटरपोलचे काम करते. सिंग यांच्या बेल्जिअमच्या पत्यावर नोटीस पाठवायची झाल्यास महाराष्ट्र पोलीस सिंग यांच्याशी संबंधित सर्व कागदपत्रे सीबीआयला सोपावतील. सीबीआयला कागदपत्रे सोपवल्यानंतर बेल्जिअमच्या मूळ भाषेत अनुवाद करण्यात येईल. त्यानंतर ही कागदपत्रे सरकारकडून त्याठिकाणच्या पोलिसांना पाठवण्यात येतील.
सीआरपीसी कलम ८१,८२ नुसार आरोपी सापडत नसेल तर त्याची मालमत्ता जप्त केली जाऊ शकते. परमबीर सिंग यांच्याकडे अनेक घरं आहेत. त्यामुळे वेगवेगळ्या पत्त्यावर वॉरंट कॉपी पाठवली जाईल. दरवाज्यावर ती लावण्यात येईल.पोलीस पंचनामा करतील. परमबीर सिंग मोठे प्रस्थ असल्याने कारवाईची बातमी टीव्ही, ऑनलाईन आणि प्रिंट मीडियातही येईल. त्यामुळे ते कोठेही असले तरी त्यांना ही बातमी समजली आहे असे मानण्यात येईल. निर्धारित तारखेनंतर पोलीस सिंग यांच्या मालमत्तेची जप्तीची मागणी करणारा अर्ज न्यायालयात दाखल करतील.
