जळगाव (प्रतिनिधी) – येथील जिल्हा मध्यवर्ती सहकारी बँकेच्या संचालक मंडळाच्या २१ जागांसाठी पक्षनिहाय जागा वाटप कारण्यासाठी शनिवार दि. ९ ऑक्टोबर रोजी अंजिठा विश्रामगृह येथे कोअर कमिटीची बैठक झाली. बैठकीत २१ जागांपैकी राष्ट्रवादी काँग्रेस व भाजपाला प्रत्येकी ७ , शिवसेनेला ५ व काँग्रेसला २ जागा देण्याचा निर्णय झाला असल्याची माहिती पालकमंत्री तथा शिवसेना उपनेते गुलाबराव पाटील यांनी प्रसिद्धी माध्यमांना दिली.
जिल्हा मध्यवर्ती सहकारी बँकेच्या निवडणुकीचा बिगुल वाजला असून शनिवारी सर्व २१ जागा बिनविरोध होण्यासाठी सर्वपक्षीय बैठक पालकमंत्री गुलाबराव पाटील यांनी घेतली होती. बैठकीत कोअर कमिटीची स्थापना करण्यात आली होती. त्यानुसार या कोअर कमिटीची शनिवारी ९ ऑक्टोबर रोजी दुपारी बैठक झाली. बैठकीमध्ये बँकेच्या निवडणुकीविषयी सर्वपक्षीय नेत्यांनी चर्चा केली. जागा वाटपाविषयी एकमेकांची मते मांडण्यात आली. यानंतर सर्वानुमते २१ जागांचे वाटप झाले. याबाबतची माहिती चारही पक्षांच्या नेत्यांनी त्यांच्या पक्ष श्रेष्ठीना कळवावी, असे यावेळी सांगण्यात आले.
जागा वाटपामध्ये राष्ट्रवादी काँग्रेस पक्षाला आणि भारतीय जनता पक्षाला समान म्हणजे ७ जागांचे वाटप झाले. तर शिवसेना पक्षाला ५ व भारतीय राष्ट्रीय काँग्रेस पक्षाला २ जागा देण्यात आले आहेत. बैठकीला शिवसेनेतर्फे पालकमंत्री गुलाबराव पाटील, ज्येष्ठ नेते आ. चिमणराव पाटील, भाजपतर्फे माजी मंत्री आ. गिरीश महाजन, आ. सुरेश भोळे, राष्ट्रवादी काँग्रेसतर्फे माजी मंत्री गुलाबराव देवकर, माजी मंत्री डॉ. सतीश पाटील, कॉग्रेसतर्फे आ. शिरीषदादा चौधरी, जिल्हाध्यक्ष प्रदीप पवार यांच्यासह माजी आ. चंद्रकांत सोनवणे यांची उपस्थिती होती. दरम्यान उपचारासाठी मुंबईला असल्यामुळे माजी मंत्री तथा राष्ट्रवादीचे नेते एकनाथराव खडसे बैठकीला अनुपस्थित होते.
जिल्हा मध्यवर्ती बँकेच्या निवडणुकीसाठी ११ ते १८ ऑक्टोबर दरम्यान उमेदवारी अर्ज दाखल करता येणार आहे. २० रोजी अर्जाची छाननी होणार असून ८ नोव्हेंबर पर्यंत माघार घेता येणार आहे. २१ नोव्हेंबर रोजी प्रत्यक्ष मतदान होणार असून २२ नोव्हेंबरला मतमोजणी होऊन निकाल जाहीर होईल.
