पाचोरा ( प्रतिनिधी ) – तालुक्यातील नगरदेवळा येथील सेंट्रल बॅंक ऑफ इंडिया कर्मचाऱ्यांच्या उर्मट वागणुकीमुळे व सुविधा मिळत नसल्याने ग्राहकांच्या नजरेतून उतरली असून सुधारणा न केल्यास बँकेला टाळे ठोकणार असल्याचे निवेदन संतप्त महिलांनी दिले आहे.
सेंट्रल बँक ऑफ इंडियाची नगरदेवळा शाखा ही परीसरातील एकच जुनी व ग्राहकांची विश्वासपात्र बँक आहे. मात्र दोन वर्षांत कर्मचाऱ्यांच्या उद्धट वागणुकीमुळे, अरेरावी मुळे व सेवा सुविधा देण्यास टाळाटाळ करण्याच्या प्रवृत्तीमुळे नकोशी झाली आहे अनेक ग्राहक खाते बंद करण्याच्या निर्णयाप्रत आलेले आहेत. या बँकेतील प्रिंटर कित्येक महिन्यांपासून बंद आहे. त्यामुळं पासबुकांत किती रक्कम आहे हे बघता येत नाही, रक्कम काढतांना अडचण येते, आयकरकरीता लागणारे मिनी स्टेटमेंट द्यायला कर्मचारी तयार नाहीत, पैसे देऊन बाहेर प्रिंट काढावी लागते, पैसे काढण्याची सोयीची असलेली टोकन पद्धत बंद आहे त्यामुळं तासन्तास रांगेत उभे राहावे लागते., जेष्ठ नागरिकांना पैसे टाकणे व काढण्यासाठी स्वतंत्र खिडकी नाही, पिण्याच्या पाण्याची सोय नाही., कर्जाच्या फाईली धूळ खात पडून आहेत ., एटीएममध्ये पैसे नसल्याने ते बंदच राहते., महिलांना असभ्य वर्तणूक दिली जात आहे., रोजगार बुडवून दिवसभर खेड्यापाड्यातील नागरिक उभे राहतात व कर्मचारी नसल्याचे कारण सांगून त्यांना हेलपाटे मारावे लागत आहेत.
सुविधा ग्राहकांना द्याव्यात व कामाचा भार पडत असेल तर राजीनामे द्यावेत अन्यथा गावातील नागरिक व महिला बँकेला टाळे ठोकतील असे शाखा व्यवस्थापक धनंजय रोकडे यांना देण्यात आलेल्या निवेदनात म्हटले आहे.
आपले कुणीच काही बिघडवू शकत नाही या तोऱ्यात हे कर्मचारी दिसतात. निवेदनावर सौ. अंजली चौहान, अभिलाषा रोकडे, भाग्यश्री पाटील, हेमलता महाजन, सरिता निकम, माधुरी महाजन, सविता पवार, अनिता परदेशी, प्रतिभा पाटील, पूनम पाटील यांच्यासह अनेकांच्या सह्या आहेत.
