नवी दिल्ली (वृत्त संस्था) – एलआयसीचा मेगा आयपीओ प्रस्तावित आहे. त्या संदर्भातल्या हालचाली वाढल्या आहेत. केंद्र सरकार त्यासाठी जून महिन्यातच इन्व्हेस्टमेंट बँकर्सकडून प्रस्ताव मागवण्याची शक्यता आहे. या प्रस्तावांच्या आधारे एलआयसी आयपीओच्या संचालनासाठी इन्व्हेस्टमेंट बँकर्सची नियुक्ती केली जाणार आहे. ब्लूमबर्गने सूत्रांच्या हवाल्याने दिलेल्या वृत्तानुसार, याच महिन्यात केंद्र सरकार इन्व्हेस्टमेंट बँकर्स कडून प्रस्ताव मागवू शकते. तसेच येत्या काही आठवड्यात एलआयसीच्या शेअर्सच्या विक्रीसाठी सरकार आमंत्रण पाठवण्याची शक्यता आहे. तसेच मार्च 2022 पर्यंत एलआयसीचा आयपीओ येऊ शकतो, अशी शक्यताही वर्तवली आहे.
एलआयसीच्या समभागांच्या विक्रीवरून केंद्र सरकारला विरोधी पक्षांच्या टीकेला सामोरे जावे लागले होते. केंद्रीय अर्थमंत्री निर्मला सीतारामन यांनी 2020-21चे अंदाजपत्रक सादर करताना LIC IPO ची घोषणा केली होती.
LIC सह एअर इंडिया अन् बीपीसीएल या कंपन्यांच्या निर्गुंतवणुकीच्या दृष्टीनेही केंद्र सरकार पुढची पावल उचलणार असल्याची अपेक्षा आहे.
महत्त्वाकांक्षी निर्गुंतवणूक योजनेद्वारे 24 अब्ज डॉलरचा निधी उभारण्याचे केंद्राचे उद्दिष्ट आहे. या निधीमुळे कोरोना संकटात खर्च वाढलेल्या सरकारला आर्थिक बळ मिळण्यास मदत होणार आहे.
LIC च्या ताज्या वार्षिक अहवालानुसार, 2019-20 मध्ये LIC ची एकूण अनुमानित संपत्ती 32 लाख कोटी रुपये अर्थात 439 अब्ज डॉलर एवढी आहे.
भारतीय बाजारपेठेतला एलआयसीचा हिस्सा जवळपास 70 टक्के आहे.
