जळगाव व उस्मानाबाद पोलिसांची संयुक्त कामगिरी
जळगाव (प्रतिनिधी) : धरणगाव तालुक्यातील पाळधी येथील लक्ष्मीनारायण पलोड यांच्या मालकीचे पलोड डिस्ट्रीब्युटर्समधून २३ लाख २० हजार ५७० रुपयांच्या टायरसह मुद्देमाल चोरणाऱ्या मुख्य संशयिताला जळगाव व उस्मानाबाद स्थानिक गुन्हे शाखेच्या पथकाने उस्मानाबाद जिल्ह्यातील वाशी तालुक्यातून अटक केली आहे. यात चोरीकामी वापरलेला ट्रकदेखील जप्त करण्यात आलेला आहे. अनिल शिंदे याला ७ सप्टेंबरपर्यंत पोलीस कोठडी मिळालेली आहे.
अनिल बिसाराम शिंदे (४५, रा.लक्ष्मी पारधी पेढी, तेरखेडा, ता.वाशी, जि.उस्मानाबाद) असे चोरट्याचे नाव आहे. पलोड डिस्ट्रीब्युटर्स नावाच्या गोडाऊनमधून ९ सप्टेबरच्या मध्यरात्री १ वाजता अज्ञात चोरट्यांनी गोडाऊनमधील नवीन टायर, ११ हजार रुपयांची रोकड व इतर वस्तू असा २३ लाख २० हजार ५७० रुपयांचा ऐवज चोरुन नेला होता. यातील केवळ एका चोरट्याचे चित्रण सीसीटीव्ही कॅमेरात चित्रीत झाले होते. त्यावरुन पोलिसांनी स्केच तयार केले. संशयिताची माहिती देणाऱ्यास ५१ हजार रुपयांचे बक्षीस पोलिस दलाने जाहीर केले होते.
यात पोलिस अधिक्षक डॉ. प्रवीण मुढे यांना चोरट्याबाबत गुप्त माहिती मिळाली. त्यानुसार डॉ. मुंढे यांनी उस्मानाबाद पोलीस अधीक्षक राजतिलक रौशन यांच्याशी संपर्क साधून चोरट्याबाबत माहिती घेतली. त्यानुसार स्थानिक गुन्हे शाखेचे पोलीस निरीक्षक बापू रोहोम यांच्या मार्गदर्शनाखाली सहायक पोलीस निरीक्षक स्वप्नील नाईक, सुधाकर अंभोरे, अशरफ शेख, अनिल देशमुख,जितेंद्र पाटील,रामकृष्ण पाटील, इद्रीस पठाण, विजय पाटील, नरेंद्र वारुळे यांचे पथक रवाना केले. उस्मानाबाद स्थानिक गुन्हे अन्वेषण शाखेचे पोलीस निरीक्षक डी. एम. शेख यांचे पथक पीएसआय ए.पी.खोडेवाड, एएसआय घायाळ, हेकॉ झोंबाडे, पोना वाघमारे, लाव्हरे पाटील, कवडे यांच्या सहकार्याने संशयित आरोपी अनिल शिंदे याला तेरखेडा येथून गावातून अटक केली. त्याच्यासह गुन्ह्यात वापरलेला ट्रक क्रमांक एमएच २५ यु १३६७ हि जप्त करून तपासकामी ताब्यात देण्यात आली आहे. दरम्यान, या गुन्ह्यातील शिंदेसोबत असलेले आणखी पाच ते सहा चोरट्यांचा पोलिस शोध घेत आहेत. तपासासाठी अनिल शिंदे याला धरणगाव पोलिसांच्या ताब्यात देण्यात आले आहे.
