जळगावचा घनकचरा प्रकल्प दोन वर्षांपासून रखडला; नागरिकांच्या आरोग्याचा प्रश्न ऐरणीवर
परिसरात रात्री धुरकट वातावरण; ठेकेदाराला ब्लॅकलिस्ट करण्याची उपमहापौर मनोज चौधरी,सभापती चंद्रशेखर पाटील यांची मागणी
जळगाव, प्रतिनिधी : शहरातील घनकचरा प्रकल्पाचे काम गेल्या दोन वर्षांपासून रखडल्याने परिसरातील नागरिकांच्या आरोग्याचा प्रश्न गंभीर बनला आहे. प्रकल्प परिसरात रात्रीच्या वेळी धुरकट वातावरण निर्माण होत असल्याच्या तक्रारी नागरिकांकडून केल्या जात आहेत. या परिस्थितीमुळे दम्यासह कर्करोगासारख्या गंभीर आजारांचा धोका निर्माण होत असल्याचा नागरिकांचा आरोप आहे. दरम्यान, उपमहापौर मनोज चौधरी यांनी घनकचरा प्रकल्पाची पाहणी करून कामातील दिरंगाईवरून महापालिका प्रशासनाला जाब विचारला.
ठेकेदारावर कारवाईची मागणी
घनकचरा प्रकल्पाचे काम दोन वर्षांपासून सुरू असूनही अद्याप पूर्ण झालेले नाही. यामुळे परिसरातील नागरिकांना त्रास सहन करावा लागत असल्याचा मुद्दा पाहणीदरम्यान उपस्थित करण्यात आला. यावेळी महापालिका आयुक्त आदित्य जीवने यांना लोकप्रतिनिधींच्या नाराजीला सामोरे जावे लागले.
प्रकल्पाचे काम रखडविणाऱ्या संबंधित ठेकेदाराला तातडीने ब्लॅकलिस्ट करण्याची मागणी उपमहापौर मनोज चौधरी, सभापती चंद्रशेखर पाटील, नगरसेविका जयश्री पाटील आणि नगरसेविका प्रतिभा देशमुख यांनी केली. प्रकल्पाचे काम वेळेत पूर्ण न झाल्याने नागरिकांच्या आरोग्याचा प्रश्न निर्माण होत असल्याबद्दल लोकप्रतिनिधींनी नाराजी व्यक्त केली.
महापालिका प्रशासनाच्या भूमिकेकडे लक्ष
घनकचरा प्रकल्पाचे रखडलेले काम, परिसरातील धुरकट वातावरण आणि नागरिकांच्या आरोग्याबाबतच्या तक्रारी यामुळे हा प्रश्न पुन्हा ऐरणीवर आला आहे. संबंधित ठेकेदारावर कारवाई होणार का आणि प्रकल्पाचे काम कधी पूर्ण होणार, याकडे आता जळगावकरांचे लक्ष लागले आहे.
