ट्रकखाली चिरडून दुचाकीस्वाराचा जागीच मृत्यू

मोतीलाल ओसवाल कंपनीचे शाखा अधिकारी रवींद्र चौधरी यांचा दुर्दैवी अंत; तरसोद बायपासची वाहतूक वळविल्याने अपघातांचा प्रश्न ऐरणीवर

जळगाव,(प्रतिनिधी) – जळगाव शहरातील आकाशवाणी परिसरातील उड्डाणपुलावर गुरुवारी सकाळी साडेनऊ ते दहाच्या सुमारास झालेल्या भीषण अपघातात दुचाकीस्वाराचा जागीच मृत्यू झाला. रवींद्र छबुलाल चौधरी (वय ३५) असे मृत व्यक्तीचे नाव असून, ते मोतीलाल ओसवाल या खासगी वित्तीय कंपनीत शाखा अधिकारी म्हणून कार्यरत होते.

कामावर जात असताना भरधाव ट्रकने त्यांच्या दुचाकीला जोरदार धडक दिली. या धडकेत ते रस्त्यावर कोसळून ट्रकच्या चाकाखाली आल्याने त्यांचा दुर्दैवी मृत्यू झाला.
रवींद्र चौधरी हे नेहमीप्रमाणे गुरुवारी सकाळी आपल्या दुचाकीने कामावर जात होते. दरम्यान, आकाशवाणी उड्डाणपुलावरून जात असताना भरधाव ट्रकने त्यांच्या दुचाकीला जोरदार धडक दिली. धडकेनंतर ते रस्त्यावर कोसळले आणि ट्रकच्या चाकाखाली आल्याने त्यांचा जागीच मृत्यू झाला. या घटनेमुळे परिसरात एकच खळबळ उडाली.

अपघाताची माहिती मिळताच शहर वाहतूक शाखेचे पोलीस निरीक्षक मोरेश्वर पेंदाम यांनी आपल्या पथकासह घटनास्थळी धाव घेतली. पोलिसांनी अपघातग्रस्त ट्रक आणि दुचाकी ताब्यात घेतली असून, या प्रकरणाचा पुढील तपास सुरू आहे.

रवींद्र चौधरी यांच्या अचानक झालेल्या मृत्यूमुळे त्यांच्या कुटुंबावर दुःखाचा डोंगर कोसळला आहे. त्यांच्या पश्चात पत्नी आणि वृद्ध आई असा परिवार आहे. ते कुटुंबातील एकमेव कमावते व्यक्ती असल्याने त्यांच्या निधनाने कुटुंबाचा मोठा आधार हरपला आहे. या दुर्दैवी घटनेने परिसरात हळहळ व्यक्त केली जात आहे.

दरम्यान, तरसोद बायपासवरील वाहतूक या मार्गावर वळविण्यात आल्यापासून आकाशवाणी उड्डाणपूल परिसरातील अपघातांचा प्रश्न पुन्हा एकदा ऐरणीवर आला आहे. या मार्गावरून मोठ्या वाहनांची वर्दळ वाढल्याने वाहनचालकांच्या सुरक्षिततेचा प्रश्न निर्माण होत असल्याची चिंता नागरिकांकडून व्यक्त केली जात आहे. या धोकादायक मार्गावरील अपघातांना आळा घालण्यासाठी प्रशासनाने तातडीने कठोर उपाययोजना कराव्यात, अशी मागणी संतप्त नागरिकांकडून केली जात आहे.