पहूर पोलिस ठाण्यात सहा जणांविरुद्ध गुन्हा; तीन आरोपी अटकेत
पहूर प्रतिनिधी) – अल्पवयीन मुलगी असल्याची माहिती असूनही तिचे लग्न लावून दिल्यानंतर तिच्यावर वारंवार लैंगिक अत्याचार करून गर्भवती केल्याचा धक्कादायक प्रकार समोर आला आहे. या प्रकरणी पहूर पोलिस ठाण्यात सहा जणांविरुद्ध भारतीय न्याय संहितेतील विविध कलमांसह पोक्सो कायदा आणि बालविवाह प्रतिबंधक अधिनियम अंतर्गत गुन्हा दाखल करण्यात आला आहे. या प्रकरणातील तीन आरोपींना अटक करण्यात आली आहे.
पोलिसांनी दिलेल्या माहितीनुसार, पीडित अल्पवयीन मुलीचे वय १४ वर्षे ८ महिने २९ दिवस असून जामनेर तालुक्यातील शेंदुर्णी येथील रहिवासी असून घरकाम करते. पीडितेच्या तक्रारीवरून पहूर पोलिस ठाणे गुन्हा क्रमांक २५३/२०२६ अन्वये भारतीय न्याय संहितेच्या कलम ६४(२)(m), ६५(१), ३५१(२), ३५२ तसेच पोक्सो कायदा कलम ४, ६, ८, १०, १२ आणि बालविवाह प्रतिबंधक अधिनियमातील कलम ६ व ९ अन्वये गुन्हा दाखल करण्यात आला आहे
अल्पवयीन असल्याची माहिती असतानाही लग्न लावल्याचा आरोप
तक्रारीनुसार करण्यात आला आहे. आरोपींनी पीडिता अल्पवयीन असल्याची माहिती असूनही संगनमत करून तिचे लग्न सचिन देवरे याच्यासोबत लावून दिल्याचा आरोप आहे. देवरे याने पीडितेच्या इच्छेविरुद्ध तिच्यावर वारंवार लैंगिक अत्याचार केल्याचा तसेच त्यामुळे ती गर्भवती झाल्याचा आरोप तक्रारीत करण्यात आला आहे.
तक्रारीनुसार, आरोपी व त्याचे जवळील नातेवाईक यांनी पीडितेला शिवीगाळ करून जीवे मारण्याची धमकी दिल्याचेही नमूद करण्यात आले आहे. या प्रकारानंतर पीडितेने दिलेल्या फिर्यादीवरून पहूर पोलिसांनी गुन्हा दाखल करून तपास सुरू केला.
या प्रकरणात राजेंद्र भिका पाटील, जिभू बळीराम पाटील, समाधान बळीराम पाटील (सर्व रा. शेंदुर्णी, ता. जामनेर) तसेच भगवान प्रल्हाद देवरे, मंदाबाई भगवान देवरे आणि सचिन भगवान देवरे (सर्व रा. आंबेडगाव, ता. पाचोरा) यांच्याविरुद्ध गुन्हा दाखल करण्यात आला आहे.
पोलिसांनी या प्रकरणात तीन आरोपींना अटक केली आहे. उर्वरित आरोपींबाबत पोलिसांकडून पुढील तपास सुरू आहे. या प्रकरणाचा तपास पोलीस उपनिरीक्षक नंदकुमार शिंब्रे, पहूर पोलिस ठाणे करीत आहेत.
