सुप्रीम कॉलनीत किरकोळ वादातून दगडफेक; पोलिसांचा बंदोबस्त
जळगाव | प्रतिनिधी
जळगाव शहरातील सुप्रीम कॉलनी परिसरात किराणा दुकानासमोर वाळू टाकण्याच्या कारणावरून दोन गटांमध्ये वाद होऊन दगडफेक झाल्याची घटना गुरुवारी रात्री सव्वादहा वाजेच्या सुमारास घडली. घटनेची माहिती मिळताच एमआयडीसी पोलिसांनी तातडीने घटनास्थळी धाव घेत परिस्थिती नियंत्रणात आणली.
पोलिसांनी दिलेल्या माहितीनुसार, सुप्रीम कॉलनीतील एका किराणा दुकानासमोर वाळू टाकण्यात आल्यावरून दुकान मालकाच्या मुलाचा एका व्यक्तीसोबत वाद झाला. त्यानंतर काही तरुणांनी एकत्र येत समोरील गल्लीत दगडफेक केल्याचे सांगण्यात आले. त्याला प्रत्युत्तर म्हणून दुसऱ्या गटातील काही व्यक्तींनीही दगडफेक केल्याची प्राथमिक माहिती आहे.
घटनेची माहिती मिळताच एमआयडीसी पोलिसांचे पथक तसेच एसडीपीओंचे आरसीपी पथक घटनास्थळी दाखल झाले. पोलिसांनी जमाव पांगवून परिस्थिती नियंत्रणात आणली.
दरम्यान, पोलिसांकडून परिसरातील सीसीटीव्ही फुटेज तसेच अन्य उपलब्ध माहितीची पडताळणी सुरू आहे. तपासाअंती दगडफेकीत सहभागी असलेल्या संबंधितांविरुद्ध कायदेशीर कारवाई करण्यात येणार असल्याचे पोलिसांनी सांगितले.
परिस्थिती नियंत्रणात; अफवांवर विश्वास न ठेवण्याचे आवाहन
सध्या सुप्रीम कॉलनी परिसरातील परिस्थिती सामान्य असून, नागरिकांनी कोणत्याही अफवांवर विश्वास ठेवू नये अथवा अफवा पसरवू नयेत, असे आवाहन पोलिसांकडून करण्यात आले आहे. नागरिकांनी शांतता व सुव्यवस्था राखण्यासाठी पोलिसांना सहकार्य करावे, असेही सांगण्यात आले.
