एमआयडीसी पोलिसांचा ‘दणका’; कट्ट्यासह रेकॉर्डवरील तिघा सराईतांना ठोकल्या बेड्या!
जळगाव: शहरातील लक्ष्मीनगर परिसरात मध्यरात्रीच्या सुमारास थरारक घटना घडली. जुन्या वादाचा राग मनात धरून हातात कट्टा अन् कोयता घेऊन तरुणाच्या घरात घुसलेल्या सराईत गुंडांनी त्याच्या आईला “तुझा मुलगा कुठे आहे, आज त्याचा मर्डरच करतो,” अशी धमकी देत परिसरात तुफान दगडफेक केली. याप्रकरणी एमआयडीसी पोलिसांनी धडक कारवाई करत रेकॉर्डवरील तिघा सराईतांच्या मुसक्या आवळल्या असून एकाकडून गावठी कट्टा जप्त केला आहे.
मिळालेली माहिती अशी की, २ ऑगस्ट रोजी रात्री १.३० वाजता लक्ष्मीनगर येथील आकाश अजय सोनार (वय २६) यांच्या घरात संशयित रोशन उर्फ बबलू हिरामन मनोरे, अविनाश रामेश्वर राठोड, गणेश भास्कर दंडगव्हाळ, जिगर बोंडारे आणि इतर तीन अनोळखी इसम बेकायदेशीरपणे घुसले. यातील बबलू धनगर याच्या हातात कोयता होता. आकाश घरात न सापडल्याने आरोपींनी त्याच्या आईला शिवीगाळ करत जीवे मारण्याची धमकी दिली व घरावर दगडफेक केली. याप्रकरणी एमआयडीसी पोलिसांत गुन्हा नोंदवण्यात आला होता.
गुन्हे शोध पथकाने १२ ऑगस्ट रोजी कारवाई करत रोशन उर्फ बबलू हिरामन मनोरे (वय २५), गणेश भास्कर दंडगव्हाळ (वय २७) आणि अविनाश रामेश्वर राठोड (वय २७) यांना ताब्यात घेतले. चौकशीदरम्यान गणेश दंडगव्हाळ याच्याकडून गुन्ह्यात वापरलेला गावठी कट्टा हस्तगत करण्यात आला आहे. न्यायालयाने तिघांना पोलीस कोठडी सुनावली असून पुढील तपास पोहेकॉ रमेश चौधरी करत आहेत. ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे व वरिष्ठ निरीक्षक बबन आव्हाड यांच्या मार्गदर्शनाखाली पीएसआय चंद्रकांत धनके, रामकृष्ण पाटील, नितीन ठाकूर, किरण पाटील, गणेश ठाकरे आणि राहुल घेटे यांच्या पथकाने केली.
