शेतातील पाणी काढण्यावरून वाद; शेतकऱ्याला मारहाण करून जीवे मारण्याची धमकी
रावेर तालुक्यातील जिन्सी येथील घटना; दोघांविरुद्ध गुन्हा दाखल
रावेर | प्रतिनिधी — शेतातील साचलेले पाणी शेतात काढण्यावरून झालेल्या वादातून एका शेतकऱ्याला शिवीगाळ करून मारहाण करण्यात आल्याची घटना रावेर तालुक्यातील जिन्सी येथे घडली. याप्रकरणी रावेर पोलिसांनी दोन जणांविरुद्ध गुन्हा दाखल केला आहे.
शेतातील पाणी काढण्यावरून वाद
पोलिसांनी दिलेल्या माहितीनुसार, फिर्यादी भगवान उखर्डू महाजन (वय ५२, रा. जिन्सी, ता. रावेर) हे १५ ऑगस्ट रोजी दुपारी साडेतीन वाजेच्या सुमारास जिन्सी शिवारातील त्यांच्या शेतात गेले होते. त्यावेळी आरोपी क्रमांक १ हा त्याच्या शेतातील साठलेले पाणी चार खड्डे खोदून फिर्यादीच्या शेतात काढत असल्याचे दिसून आले.
फिर्यादीने आरोपीला शेतात पाणी काढण्यासाठी खड्डे खोदू नका, असे सांगितले. त्यावरून आरोपी क्रमांक १ व २ तेथे आले आणि त्यांनी फिर्यादीला शिवीगाळ करण्यास सुरुवात केली. त्यानंतर आरोपी क्रमांक १ याने फिर्यादीच्या पाठीवर पावड्याने मारहाण केल्याचे तक्रारीत नमूद आहे.
यानंतर आरोपी क्रमांक २ यानेही फिर्यादीला चापटाबुक्क्यांनी मारहाण केली. दोन्ही आरोपींनी फिर्यादीला जीवे ठार मारण्याची धमकी दिल्याचे पोलिसांनी नमूद केले आहे. घटनेनंतर फिर्यादीने रावेर पोलीस ठाण्यात धाव घेत तक्रार दिली.
फिर्यादीच्या तक्रारीवरून रावेर पोलीस ठाण्यात गुन्हा रजिस्टर क्रमांक ३८६/२०२६ अन्वये भारतीय न्याय संहिता कलम ११८(१), ११५(२), ३५२, ३५१(२), ३५१(३) व ३(५) प्रमाणे गुन्हा दाखल करण्यात आला आहे. या प्रकरणात पुनमचंद मेहरचंद पवार आणि वीरेंद्र पुनमचंद पवार, दोघेही रा. जिन्सी, ता. रावेर, यांचा आरोपी म्हणून समावेश आहे.
घटनेचा पुढील तपास रावेर पोलीस ठाण्याचे पोलीस हवालदार ईश्वर जुलालसिंग चव्हाण करीत आहेत. महसुली अथवा शेतजमिनीच्या वादातून हा प्रकार घडला का, यासह घटनेच्या अनुषंगाने पुढील तपास करण्यात येत आहे.
