जागतिक आदिवासी दिनानिमित्त तडवी समाज बांधवांचा वृक्षारोपण उपक्रम
जळगाव : जागतिक आदिवासी दिनाचे औचित्य साधून तडवी समाज बांधवांच्या वतीने ‘झाडे लावा, झाडे जगवा’ या संदेशातून शहरात वृक्षारोपणाचा उपक्रम राबविण्यात आला. या उपक्रमांतर्गत विविध ठिकाणी सुमारे १०० वृक्षांची लागवड करण्यात आली.
नगरसेवक संतोष पाटील यांच्या हस्ते शुभारंभ
८ ऑगस्ट रोजी नगरसेवक संतोष पाटील यांच्या हस्ते पहिले रोप लावून या उपक्रमाची सुरुवात करण्यात आली. वाघनगर स्टॉप परिसर तसेच जिजाऊ नगर, गिरणा पंपिंग रोड परिसरात वृक्षारोपण करण्यात आले.
श्रीराम चौक परिसरातही वृक्षारोपण
९ ऑगस्ट रोजी श्रीराम चौक येथे वृक्षारोपण करण्यात आले. यावेळी श्रीराम चौक उत्सव समितीचे पदाधिकारी, राजकीय व सामाजिक कार्यकर्ते, ज्येष्ठ नागरिक, तडवी समाज बांधव तसेच तडवी समाजातील महिला मोठ्या संख्येने उपस्थित होत्या. यानंतर जिजाऊ नगर (तडवी कॉलनी) येथील गॅस गोडाऊन रोड परिसरातही वृक्षारोपण करण्यात आले.
पर्यावरण संवर्धनासाठी नागरिकांनी पुढाकार घेऊन लावलेल्या झाडांची नियमित देखभाल व संगोपन करण्याचा संकल्प यावेळी करण्यात आला. जागतिक आदिवासी दिनाच्या निमित्ताने राबविण्यात आलेल्या या उपक्रमातून पर्यावरण संरक्षणाचा संदेश देण्यात आला.
