शासकीय कामात अडथळा आणत ग्रामपंचायत कर्मचाऱ्याला मारहाण
उटखेडा ग्रामपंचायत कार्यालयातील प्रकार; अश्लील शिवीगाळ करत जीवे मारण्याची धमकी
रावेर : उटखेडा ग्रामपंचायत कार्यालयात शासकीय कामकाज सुरू असताना कर्मचाऱ्याला शिवीगाळ करून मारहाण व जीवे मारण्याची धमकी दिल्याप्रकरणी रावेर पोलिस ठाण्यात गुन्हा दाखल करण्यात आला आहे. ही घटना १२ ऑगस्ट रोजी सकाळी ११ वाजेच्या सुमारास घडली.
पोलिसांनी दिलेल्या माहितीनुसार, प्रकाश सुरेश चौधरी (वय ४०, व्यवसाय-नोकरी, ग्रामपंचायत क्लर्क, रा. उटखेडा, ता. रावेर) हे ग्रामपंचायत कार्यालयात शासकीय कामकाज करीत होते. यावेळी वासुदेव ऊर्फ गोकुळ प्रकाश पाटील (रा. उटखेडा, ता. रावेर) हा तेथे आला. शासकीय कामात अडथळा निर्माण करण्याच्या कारणावरून त्याने फिर्यादी व साक्षीदारांना अश्लील शिवीगाळ केली. त्यानंतर फिर्यादीची गच्ची पकडून चापटाबुक्क्यांनी मारहाण केल्याचे तक्रारीत नमूद आहे.
फिर्यादीला सोडविण्यासाठी साक्षीदार पुढे आले असता त्यांनाही चापटाबुक्क्यांनी मारहाण करण्यात आली. तसेच, “तुम्हा सर्वांना जिवे मारून टाकीन,” अशी धमकी देत शासकीय कामकाजात अडथळा निर्माण केल्याचे फिर्यादीत म्हटले आहे.
या प्रकरणी प्रकाश चौधरी यांच्या फिर्यादीवरून रावेर पोलिस ठाण्यात गुन्हा क्रमांक ३८५/२०२६ दाखल करण्यात आला आहे. भारतीय न्याय संहितेच्या कलम १३२, २९६, ११५(२), ३५१(२)(३) व ३५२ अन्वये गुन्हा नोंदविण्यात आला असून पुढील तपास पोहेकॉ/३२०१ सिकंदर तडवी करीत आहेत.
