कासोद्यात १४ वर्षीय अल्पवयीन मुलीची विहिरीत उडी घेऊन आत्महत्या
तरुणाच्या त्रासाला कंटाळून उचलले पाऊल, कासोदा पोलिसांत आत्महत्येस प्रवृत्त केल्याचा गुन्हा दाखल
कासोदा (विशेष प्रतिनिधी): एका १४ वर्षीय अल्पवयीन मुलीला बरे-वाईट बोलून सतत मानसिक त्रास दिल्यामुळे, त्या त्रासाला कंटाळून तिने विहिरीत उडी घेऊन आत्महत्या केल्याची काळीज पिळवटून टाकणारी घटना कासोदा (ता. एरंडोल) येथे उघडकीस आली आहे. १ जुलै २०२६ रोजी सकाळी ९:४५ वाजेच्या सुमारास ही घटना घडली होती. या प्रकरणी सखोल तपासानंतर १० ऑगस्ट रोजी कासोदा पोलीस ठाण्यात संशयित तरुणाविरुद्ध आत्महत्येस प्रवृत्त केल्याचा गंभीर गुन्हा दाखल करण्यात आला आहे.
नेमकी काय घडली घटना?
कासोदा शहरातील इंदिरा नगर भागातील रहिवासी असलेल्या सानिया पठाण (वय १४ वर्षे २ महिने) या अल्पवयीन मुलीला त्याच परिसरात राहणारा संशयित आरोपी अरबाज जुम्मन शेख (रा. इंदिरा नगर, कासोदा, ता. एरंडोल; हल्ली मुक्काम- कुऱ्हाड, ता. पाचोरा) हा सतत बरे-वाईट बोलून मानसिक त्रास देत होता.
त्याच्या या सततच्या त्रासाला आणि छळाला कंटाळून सानिया हिने १ जुलै २०२६ रोजी जुना जवखेडा रोडवरील दत्तात्रय भगवान चौधरी यांच्या शेतातील (गट क्र. ५९/२) विहिरीत उडी घेतली. पाण्यात बुडून तिचा दुर्दैवी मृत्यू झाला.
संशयिताविरुद्ध गुन्हा दाखल
मुलीच्या मृत्यूनंतर तिचे वडील नबीयार खान युनूसखान पठाण (वय ४६, व्यवसाय- मिस्त्रीकाम, रा. इंदिरा नगर, कासोदा) यांनी दिलेल्या फिर्यादीवरून १० ऑगस्ट २०२६ रोजी कासोदा पोलीस ठाण्यात संशयित अरबाज जुम्मन शेख याच्याविरुद्ध भारतीय न्याय संहिता (BNS) २०२३ चे कलम १०७ (आत्महत्येस प्रवृत्त करणे) अन्वये गुन्हा नोंदवण्यात आला आहे
