सावखेडा येथे गोठ्यातून तीन बैलजोड्या चोरीला; ९० हजारांचा मुद्देमाल लंपास
रात्रीच्या अंधाराचा फायदा घेत अज्ञात चोरट्यांचा डाव; सावदा पोलिसांत गुन्हा दाखल
सावखेडा बु. (ता. रावेर) : सावखेडा बु. गावठाण परिसरातील गोठ्यातून अज्ञात चोरट्यांनी तब्बल तीन बैलजोड्या चोरून नेल्याची घटना समोर आली आहे. या चोरीत एकूण ९० हजार रुपये किमतीचे सहा बैल लंपास झाले असून, या प्रकरणी सावदा पोलीस ठाण्यात गुन्हा दाखल करण्यात आला आहे.
पहाटेच्या सुमारास चोरी
पोलिसांनी दिलेल्या माहितीनुसार, ७ ऑगस्ट रोजी रात्री १२.३० ते पहाटे ५ वाजेच्या दरम्यान सावखेडा बु. ते लोहरा रस्त्यावरील गोठ्यातून अज्ञात चोरट्यांनी बैल चोरून नेले. सकाळी हा प्रकार लक्षात आल्यानंतर गोठ्याच्या मालकाने पोलिसांत धाव घेतली.
९० हजारांचे सहा बैल लंपास
चोरीस गेलेल्या जनावरांमध्ये ३० हजार रुपये किमतीची लाल तुपकरी रंगाची निंबाळी जातीची दोन बैल, ३५ हजार रुपये किमतीची पांढऱ्या शुभ्र रंगाची नागोरी जातीची दोन बैल, तसेच २५ हजार रुपये किमतीचे एक पांढऱ्या रंगाचे व एक लाल तुपकरी रंगाचे गावठी जातीचे बैल, अशा एकूण तीन बैलजोड्यांचा समावेश आहे.
अज्ञात चोरट्यांविरुद्ध गुन्हा
या प्रकरणी अलाउद्दीन नबाब तडवी (वय ३३, रा. सावखेडा बु., ता. रावेर) यांनी सावदा पोलिसांत फिर्याद दिली. त्यांच्या फिर्यादीवरून अज्ञात चोरट्याविरुद्ध भारतीय न्याय संहिता कलम ३०३(२) अन्वये गुन्हा दाखल करण्यात आला आहे.
घटनेचा पुढील तपास पोलीस हेड कॉन्स्टेबल निलेश बाविस्कर करीत आहेत. चोरीस गेलेल्या जनावरांचा आणि अज्ञात चोरट्यांचा शोध घेण्यासाठी पोलिसांकडून तपास सुरू आहे.
