पाचोरा येथे बालविवाह प्रकरणी पतीसह सासरे, सासू व आई-वडिलांवर पोक्सो व बलात्काराचा गुन्हा दाखल
पाचोरा: अल्पवयीन मुलीचा बालविवाह लावून देऊन तिचा लैंगिक छळ करण्यास प्रोत्साहन दिल्याप्रकरणी पाचोरा पोलीस ठाण्यात पतीसह सासू, सासरे आणि आई-वडिलांवर पोक्सो (POCSO) कायदा व बालविवाह प्रतिबंधक कायद्यानुसार गुन्हा दाखल करण्यात आला आहे.
पोलीस सूत्रांकडून मिळालेल्या सविस्तर माहितीनुसार, या प्रकरणातील पीडित मुलगी ही १७ वर्षे १ महिना व ९ दिवस वयाची (अल्पवयीन) असून ती सध्या पाचोरा येथे सासरी राहते. पीडिता ही अल्पवयीन असल्याचे माहीत असतानाही तिच्या आई-वडिलांनी आणि सासू-सासऱ्यांनी तिचा विवाह संशयित आरोपी याच्याशी लावून दिला.
हा बालविवाह ४ ऑगस्ट २०२५ ते २० जुलै २०२६ या कालावधीत पार पडला. विवाहानंतर पती याने पीडितेसोबत वारंवार शारीरिक संबंध ठेवल्याने ती गरोदर राहिली व तिने एका बालकाला जन्म दिला. अल्पवयीन मुलीचा विवाह लावून देऊन तिच्यासोबत झालेल्या बाललैंगिक अत्याचारास प्रोत्साहन दिल्याचे तपासात उघड झाले आहे.
पीडित मुलीच्या जबाबावरून ६ ऑगस्ट २०२६ रोजी पाचोरा पोलीस ठाण्यात गुन्हा नोंद क्रमांक ३६७/२०२६ नुसार भारतीय न्याय संहिता (BNS) कलम ६४(२)(i), ६४(२)(m), ३(५) तसेच बालकांचे लैंगिक अपराधांपासून संरक्षण अधिनियम (POCSO Act) २०१२ चे कलम ४, ६, १७ आणि बालविवाह प्रतिबंधक अधिनियम २०२६ चे कलम ९, ११ अन्वये गुन्हा दाखल करण्यात आला आहे.
या घटनेची गंभीर दखल घेत पाचोरा पोलीस ठाण्याचे पोलीस निरीक्षक राहुलकुमार पवार यांनी तपासाचे आदेश दिले असून या प्रकरणाचा पुढील सखोल तपास पोलीस उपनिरीक्षक कृष्णा घायाळ करत आहेत.
