जळगाव शहरातील डॉक्टरांच्या घरात घरफोडी; रोख रक्कम व सोन्याचे दागिने लंपास
जळगाव | प्रतिनिधी
जळगाव शहरातील राधा अपार्टमेंट, स्वामी समर्थ केंद्राजवळ, भागीरथ कॉलनी परिसरात अज्ञात चोरट्यांनी एका डॉक्टरांच्या बंद घराचे कुलूप तोडून घरफोडी केली. या चोरीत रोख रक्कम आणि सोन्याचे दागिने असा एकूण ६५ हजार रुपयांचा ऐवज लंपास करण्यात आला. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, उमाकांत दिलीप जावळे (वय ४२, व्यवसाय – डॉक्टर) हे ममुराबाद येथील रहिवासी असून सध्या राधा अपार्टमेंट, भागीरथ कॉलनी येथे वास्तव्यास आहेत. ५ ऑगस्ट रोजी सकाळी ९ ते १२.३० या वेळेत अज्ञात चोरट्यांनी त्यांच्या घराचे कुलूप तोडून आत प्रवेश केला.
चोरट्यांनी घरातील गोदरेज कपाटातील २५ हजार रुपये रोख तसेच सुमारे ४० हजार रुपये किमतीचे सोन्याचे दागिने चोरून नेले. चोरीस गेलेल्या दागिन्यांमध्ये सोन्याचे पोत, कानातील रिंग, पुरुष व महिलेची अंगठी तसेच सोन्याच्या बाळ्यांचा समावेश आहे.
या प्रकरणी जिल्हापेठ पोलीस ठाण्यात भारतीय न्याय संहिता (BNS) २०२३ मधील कलम ३०५(अ) व ३३१(३) अन्वये अज्ञात चोरट्याविरुद्ध गुन्हा दाखल करण्यात आला आहे.
या गुन्ह्याचा पुढील तपास पोलीस उपनिरीक्षक (GPSI) उल्हास चव्हाटे करीत असून अद्याप कोणालाही अटक करण्यात आलेली नाही.
