आंतरजातीय प्रेमविवाहाचा राग अन् मेहुण्याचा खून; उपचारादरम्यान तरुणाचा मृत्यू
जामनेर तालुक्यातील फत्तेपूर येथील धक्कादायक घटना; शालकावर खुनाचा गुन्हा
जामनेर | प्रतिनिधी
जामनेर तालुक्यातील फत्तेपूर येथे बहिणीशी आंतरजातीय प्रेमविवाह केल्याचा राग मनात धरून शालकाने मेहुण्याच्या डोक्यात दगड घालून गंभीर जखमी केल्याची धक्कादायक घटना घडली. जखमी तरुणाचा छत्रपती संभाजीनगर येथील घाटी रुग्णालयात उपचारादरम्यान मृत्यू झाल्याने या प्रकरणात आता खुनाचा गुन्हा दाखल करण्यात आला आहे.
मिळालेल्या माहितीनुसार, फत्तेपूर येथील सुभाषनगर भागातील रहिवासी प्रशांत सुभाष चौधरी (वय २६) याने वडगाव सद्दो येथील अभिषेक संतोष मोरे याच्या बहिणीशी आंतरजातीय प्रेमविवाह केला होता. या विवाहाचा राग आरोपी अभिषेक मोरे याच्या मनात होता.
जंगलात नेऊन दगडाने हल्ला
२७ जुलै रोजी सायंकाळी अभिषेक मोरे याने प्रशांत चौधरी याला त्याच्याच दुचाकीवर बसवून तोरनाळे जंगल परिसरात नेले. तेथे दोघांमध्ये वाद झाला. संतापाच्या भरात अभिषेकने प्रशांतच्या डोक्यात दगड घालून गंभीर जखमी केले. त्याचा मृत्यू झाल्याचा समज करून आरोपीने त्याच्या अंगावर झाडांचा पाला टाकला आणि त्याची दुचाकी घेऊन घटनास्थळावरून पळ काढला.
पोलिसांच्या तपासात उलगडा
घटनेनंतर पोलिसांनी आरोपी अभिषेक मोरे याला ताब्यात घेतले. चौकशीदरम्यान त्याने गुन्ह्याची कबुली दिल्यानंतर पोलिसांनी त्याला घटनास्थळी नेले. तेव्हा प्रशांत चौधरी हा मृत्यूशी झुंज देत असल्याचे आढळून आले. पोलिसांनी त्याला तातडीने जळगाव जिल्हा सामान्य रुग्णालयात दाखल केले.
उपचारादरम्यान मृत्यू
जिल्हा रुग्णालयात मेंदूविकार तज्ज्ञ उपलब्ध नसल्याने प्रशांत चौधरी याला पुढील उपचारासाठी छत्रपती संभाजीनगर येथील घाटी रुग्णालयात हलविण्यात आले. मात्र, उपचार सुरू असताना ३१ जुलै रोजी त्याचा मृत्यू झाला.
खुनाचा गुन्हा दाखल
प्रशांतच्या मृत्यूनंतर आरोपी अभिषेक मोरे याच्याविरुद्ध खुनाचा गुन्हा दाखल करण्यात आला आहे. तो सध्या पोलिस कोठडीत असून या प्रकरणाचा पुढील तपास सहाय्यक पोलीस निरीक्षक अंकुश जाधव व त्यांचे पथक करीत आहे. दरम्यान, मयताच्या नातेवाईकांनी आरोपीला कठोर शिक्षा देण्याची मागणी केली आहे.
