फत्तेपूर पोलिसांकडून आरोपीला अटक
फत्तेपूर (विशेष प्रतिनिधी): आंतरजातीय प्रेमविवाह केल्याचा राग मनात धरून सख्ख्या मेहुण्यावर दगडफेक करत त्याला जीवे मारण्याचा प्रयत्न केल्याची धक्कादायक घटना जामनेर तालुक्यातील तोरणमाळे घाटातील बंदी (जंगल) परिसरात घडली आहे. या जीवघेण्या हल्ल्यात प्रशांत सुभाष चौधरी (वय २६, रा. सुभाषपुरा, फत्तेपूर) हा तरुण गंभीर जखमी झाला असून, त्याच्यावर संभाजी नगर येथे घाटी रुग्णालयात उपचार सुरू आहेत. या प्रकरणी फत्तेपूर पोलिसांनी गुन्हा दाखल करत आरोपी अभिषेक संतोष मोरे (वय १९, रा. वडगाव सडो, ता. जामनेर) याला अटक केली आहे.
पोलिसांनी दिलेल्या माहितीनुसार, जखमी प्रशांत चौधरी याने आरोपी अभिषेक मोरे याची बहीणशी काही दिवसांपूर्वी आंतरजातीय प्रेमविवाह केला होता. बहिणीने आंतरजातीय विवाह केल्याचा तीव्र राग अभिषेकच्या मनात होता. याच रागातून अभिषेकने प्रशांत याला तोरणमाळे घाटातील निर्जन अशा बंदी (जंगल) भागात नेले. तिथे २७ जुलै २०२६ रोजी दुपारी ४ ते २८ जुलै २०२६ रोजी पहाटे १ वाजेच्या दरम्यान, आरोपी अभिषेकने प्रशांतच्या डोक्यात दगडाने सपासप वार केले. या हल्ल्यात प्रशांत गंभीररीत्या जखमी झाला.
या प्रकरणी जखमी प्रशांतची आई सरला नामदेव चौधरी (वय ५०, व्यवसाय- मजुरी) यांनी २८ जुलै रोजी सायंकाळी ५:३९ वाजता फत्तेपूर पोलीस ठाण्यात फिर्याद दिली. त्यांच्या फिर्यादीवरून आरोपी अभिषेक मोरे याच्याविरुद्ध फत्तेपूर पोलीस ठाण्यात गुन्हा रजि. नं. १६९/२०२६ नुसार, भारतीय न्याय संहिता (BNS) २०२३ चे कलम १०९(१) (जीवे मारण्याचा प्रयत्न) अन्वये गुन्हा दाखल करण्यात आला आहे.
घटनेचे गांभीर्य ओळखून पाचोरा विभागाचे माननीय उपविभागीय पोलीस अधिकारी श्री. बापू रोहोम यांच्या मार्गदर्शनाखाली फत्तेपूर पोलीस ठाण्याचे सहाय्यक पोलीस निरीक्षक (सपोनि) अंकुश जाधव यांनी तातडीने तपासचक्रे फिरवून आरोपी अभिषेक मोरे याला ताब्यात घेतले आहे. आरोपीला अटक करण्यात आली असून पोलीस या प्रकरणाचा पुढील तपास करत आहेत. प्रशांत सुभाष चौधरी हा तरुण गंभीर जखमी झाला असून, त्याच्यावर संभाजी नगर येथे घाटी रुग्णालयात आयसीयु मध्ये उपचार सुरू असुन.त्याचे तब्येत चितांनक आहे.
