WhatsApp चा आयफोन यूझर्सना नवा अनुभव; चॅट डिझाइनमध्ये मोठा बदल, लवकरच मिळणार अपडेट
मेसेज बबल अधिक गोलाकार, फोटो-व्हिडिओ बॉर्डरशिवाय; अनेक नवीन फीचर्सचीही तयारी
मुंबई | प्रतिनिधी : लोकप्रिय मेसेजिंग अॅप WhatsApp आपल्या आयफोन (iOS) वापरकर्त्यांसाठी आकर्षक आणि आधुनिक चॅट डिझाइन आणण्याच्या तयारीत आहे. आगामी अपडेटमध्ये मेसेज बबलचा लूक पूर्णपणे बदलणार असून, चॅटिंगचा अनुभव अधिक स्वच्छ आणि आकर्षक होणार आहे. सध्या हे फीचर निवडक बीटा यूझर्ससाठी उपलब्ध असून, येत्या काही आठवड्यांत सर्व आयफोन वापरकर्त्यांसाठी ते टप्प्याटप्प्याने उपलब्ध होण्याची शक्यता आहे.
WABetaInfo च्या अहवालानुसार, WhatsApp Beta for iOS 26.29.10.70 या आवृत्तीमध्ये नवीन चॅट डिझाइनची चाचणी सुरू आहे. या अपडेटनंतर मेसेज बबल अधिक गोलाकार (Rounded) आणि सॉफ्ट लूकमध्ये दिसतील. नव्या डिझाइनची झलक Apple च्या iMessage आणि Liquid Glass डिझाइनशी मिळती-जुळती असल्याचे सांगितले जात आहे.
फक्त मेसेज बबलच नव्हे, तर फोटो, व्हिडिओ आणि GIF देखील नव्या पद्धतीने दिसणार आहेत. सध्या हे मीडिया फाइल्स मेसेज बबलच्या बॉर्डरमध्ये दिसतात. मात्र, नवीन अपडेटनंतर त्या बॉर्डरशिवाय दिसतील, त्यामुळे संपूर्ण चॅट इंटरफेस अधिक स्वच्छ, आधुनिक आणि आकर्षक वाटेल.
या नव्या डिझाइनचे अधिकृत रोलआउट कधी होणार, याबाबत WhatsApp कडून अद्याप घोषणा करण्यात आलेली नाही. मात्र, बीटा चाचणी सुरू असल्याने हे फीचर लवकरच सर्व आयफोन वापरकर्त्यांपर्यंत पोहोचण्याची शक्यता वर्तवली जात आहे.
दरम्यान, WhatsApp केवळ डिझाइनमध्येच नव्हे तर सुरक्षेच्या दृष्टीनेही मोठे बदल करण्याच्या तयारीत आहे. Two-Step Verification मध्ये ६ अंकी PIN ऐवजी पासवर्डचा पर्याय देण्यावर कंपनी काम करत असल्याची माहिती समोर आली आहे. यामुळे वापरकर्त्यांचे खाते अधिक सुरक्षित होण्यास मदत होईल.
याशिवाय, WhatsApp च्या बहुप्रतीक्षित Username फीचरवरही काम सुरू आहे. हे फीचर उपलब्ध झाल्यानंतर वापरकर्त्यांना आपला मोबाईल क्रमांक न देता केवळ Username द्वारे इतरांशी संवाद साधता येणार आहे. त्यामुळे गोपनीयता आणि सुरक्षिततेला अधिक बळ मिळणार आहे.
आगामी या सर्व अपडेट्समुळे आयफोनवरील WhatsApp चा अनुभव अधिक आकर्षक, आधुनिक आणि सुरक्षित होणार असल्याची अपेक्षा व्यक्त केली जात आहे.
