अज्ञात चोरट्यांविरुद्ध गुन्हा दाखल; सुमारे ३८ हजार रुपयांच्या ऐवजावर डल्ला
भडगाव (प्रतिनिधी) : तालुक्यातील कजगाव येथे बंद घर फोडून अज्ञात चोरट्यांनी रोकड व सोन्याचे दागिने असा सुमारे ३८ हजार रुपयांचा ऐवज लंपास केल्याची घटना उघडकीस आली आहे. याप्रकरणी भडगाव पोलीस ठाण्यात अज्ञात चोरट्याविरुद्ध घरफोडीचा गुन्हा दाखल करण्यात आला आहे.
पोलीसांनी दिलेल्या माहितीनुसार, फिर्यादी फारुख सलीम खाटीक (वय ५२, व्यवसाय – मटन विक्री, रा. सीटी पाटील नगर, कजगाव, ता. भडगाव) यांच्या राहत्या घरात १८ जुलै रोजी रात्री १० ते १९ जुलै रोजी पहाटे ४ वाजेदरम्यान अज्ञात चोरट्यांनी प्रवेश केला.
चोरट्यांनी घराचे कुलूप तोडून घरात ठेवलेली ३० हजार रुपयांची रोकड तसेच सुमारे ८ हजार रुपये किमतीचे दोन ग्रॅम वजनाचे सोन्याचे दागिने चोरून नेले. चोरीनंतर फिर्यादी यांनी भडगाव पोलीस ठाण्यात तक्रार दाखल केली.
या प्रकरणी भारतीय न्याय संहिता, २०२३ मधील संबंधित कलमान्वये अज्ञात चोरट्यांविरुद्ध गुन्हा दाखल करण्यात आला आहे.
या गुन्ह्याचा पुढील तपास पोहेकॉ. नरेंद्र विसपुते हे करीत आहे.
