रोख रक्कम व एचपी कंपनीचे पीयूसी केबल चोरी; अज्ञात चोरट्याविरुद्ध गुन्हा दाखल
पाचोरा ( प्रतिनिधी ) – पाचोरा तालुक्यातील पिंपळगाव हरेश्वर गावाजवळील अळगव्हाण रस्त्यावरील एका कृषी सेवा केंद्राचे कुलूप तोडून अज्ञात चोरट्याने रोख रक्कम आणि साहित्य असा एकूण ६६ हजार १९० रुपयांचा ऐवज लंपास केल्याची घटना उघडकीस आली आहे. याप्रकरणी पिंपळगाव हरेश्वर पोलीस ठाण्यात अज्ञात चोरट्याविरुद्ध घरफोडीचा गुन्हा दाखल करण्यात आला आहे.
पोलिसांनी दिलेल्या माहितीनुसार, १८ जुलै २०२६ रोजी सकाळी साडेसात वाजण्याच्या सुमारास अळगव्हाण रस्त्यावरील हर्षित अॅग्रो एजन्सी कृषी केंद्रात चोरी झाल्याचे निदर्शनास आले. अज्ञात चोरट्याने दुकानाच्या दरवाजाचे कुलूप तोडून आत प्रवेश केला आणि दुकानातील ५९ हजार १९० रुपयांची रोख रक्कम तसेच एचपी कंपनीचे सुमारे ७ हजार रुपयांचे पीयूसी केबल चोरून नेले.
या प्रकरणी कृषी केंद्राचे मालक पवन विजय नैनाव (वय ३४, रा. मोराड, ता. जामनेर, जि. जळगाव) यांनी दिलेल्या फिर्यादीवरून गु.र.नं. ३४६/२०२६ अन्वये भारतीय न्याय संहिता कलम ३०५(अ) व ३३१(४) अंतर्गत अज्ञात चोरट्याविरुद्ध गुन्हा दाखल करण्यात आला आहे.
या घटनेचा पुढील तपास पोहेकॉ. किरण ब्राह्मणे हे करीत असून, परिसरातील सीसीटीव्ही फुटेज तसेच अन्य तांत्रिक पुराव्यांच्या आधारे आरोपींचा शोध सुरू असल्याची माहिती पोलिसांनी दिली.
