स्टेशन रोड व कृषी उत्पन्न बाजार समिती परिसरातील घटना; अज्ञात चोरट्यांविरुद्ध स्वतंत्र गुन्हे दाखल
चाळीसगाव (प्रतिनिधी) : चाळीसगाव शहरात वाहनचोरीच्या घटनांमध्ये पुन्हा वाढ होत असून, अवघ्या एका दिवसात दोन वेगवेगळ्या ठिकाणांहून दोन मोटारसायकली चोरीला गेल्याने नागरिकांमध्ये भीतीचे वातावरण निर्माण झाले आहे. या दोन्ही प्रकरणांमध्ये अज्ञात चोरट्यांविरुद्ध चाळीसगाव शहर पोलीस ठाण्यात भारतीय न्याय संहिता (BNS) कलम 303(2) अन्वये गुन्हे दाखल करण्यात आले असून, पोलिसांनी तपास सुरू केला आहे.
घरासमोरून १० हजारांची दुचाकी चोरी
पहिल्या घटनेत अभिजित भाऊसाहेब राऊत (वय ३९, व्यवसाय – शिक्षक, रा. स्टेशन रोड, गुडशेफर्ड शाळेसमोर, चाळीसगाव) यांनी फिर्याद दिली आहे. त्यांच्या मालकीची हिरो होंडा ड्रीम युव्हा (क्र. MH-19-BT-7818) ही सुमारे १० हजार रुपये किंमतीची मोटारसायकल ११ जुलै रात्री ९ ते १२ जुलै सकाळी ८ वाजेदरम्यान घरासमोरून अज्ञात चोरट्याने चोरून नेली.
बाजार समिती परिसरातून २० हजारांची स्प्लेंडर प्लस लंपास
दुसऱ्या घटनेत रावसाहेब तुकाराम कोळी (वय ३६, व्यवसाय – शेती) यांनी दिलेल्या फिर्यादीनुसार, हिरो होंडा स्प्लेंडर प्लस (क्र. MH-20-GG-8144) ही सुमारे २० हजार रुपये किंमतीची मोटारसायकल चाळीसगाव कृषी उत्पन्न बाजार समिती कार्यालयाजवळून १२ जुलै रोजी सकाळी चोरीला गेली.
पोलिसांकडून चोरट्यांचा शोध सुरू
दोन्ही घटनांमध्ये अज्ञात आरोपींविरुद्ध गुन्हे दाखल करण्यात आले असून, परिसरातील सीसीटीव्ही फुटेजची तपासणी करून संशयितांचा शोध घेतला जात आहे. या सलग वाहनचोरीच्या घटनांमुळे शहरातील वाहनधारकांमध्ये चिंतेचे वातावरण निर्माण झाले असून, नागरिकांनी वाहने सुरक्षित ठिकाणी उभी करावीत तसेच शक्य असल्यास अतिरिक्त सुरक्षा साधनांचा वापर करावा, असे आवाहन पोलिसांनी केले आहे.
