रावेर तालुक्यातील धक्कादायक प्रकार; तिघांविरुद्ध जबरी चोरीचा गुन्हा, तिन्ही आरोपी अटकेत
रावेर ( प्रतिनिधी ) – मजुरीचे काम देण्याचे आमिष दाखवून एका बांधकाम ठेकेदाराला शेतात नेऊन मारहाण करत मोबाईलद्वारे फोन-पे अॅपमधून ८ हजार रुपये जबरदस्तीने ट्रान्सफर करून घेतल्याची धक्कादायक घटना रावेर तालुक्यात उघडकीस आली आहे. या प्रकरणी रावेर पोलिस ठाण्यात जबरी चोरीचा गुन्हा दाखल करण्यात आला असून तिन्ही आरोपींना अटक करण्यात आली आहे.
फिर्यादी शेख जाबीर शेख अमान (वय ४१, रा. फारुकी आजम कॉलनी, चिनावल, ता. रावेर) हे बांधकाम ठेकेदार आहेत. आरोपी मुस्तकीम याने दोन मजूर कामासाठी उपलब्ध असल्याचे सांगून फिर्यादीला अजंदा रेल्वे पुलाजवळील परिसरात बोलावले. तेथे त्याच्या अन्य दोन साथीदारांसह फिर्यादीला एका केळीच्या शेतात नेण्यात आले.
शेतात नेल्यानंतर आरोपींनी फिर्यादीला चाकूचा धाक दाखवत मारहाण केली. त्यांच्याकडील रोख रक्कम मागितली. फिर्यादीकडे केवळ ५०० रुपये असल्याचे सांगितल्यानंतर आरोपींनी त्यांचा मोबाईल हिसकावून घेतला.
आरोपींनी मोबाईलमधील फोन-पे अॅप उघडून पिन क्रमांक विचारला. सुरुवातीला फिर्यादीने नकार दिल्यानंतर आरोपींनी पुन्हा मारहाण करून जीवे मारण्याची धमकी दिली. भीतीपोटी फिर्यादीने पिन क्रमांक दिल्यानंतर आरोपींनी फोन-पेद्वारे ५ हजार आणि ३ हजार असे एकूण ८ हजार रुपये जबरदस्तीने ट्रान्सफर करून घेतले.
या प्रकरणी रावेर पोलिस ठाण्यात भारतीय न्याय संहिता कलम ३०९(६), ३५१(२), ३५१(३) आणि ३(५) अन्वये गुन्हा दाखल करण्यात आला आहे. पोलिसांनी तातडीने तपासाची चक्रे फिरवत तिन्ही आरोपींना अटक केली आहे.
पुण्याला गेल्याचा फायदा घेत घरफोडी; रोख रकमेसह ७४ हजारांचा ऐवज लंपास
