वढोदा गावातील खळबळजनक घटना; महसूल अधिकाऱ्यांच्या फिर्यादीवरून ३ जणांवर गुन्हा दाखल
चोपडा (प्रतिनिधी): तालुक्यातील वढोदा गावामध्ये अवैध वाळू उपसा आणि वाहतूक करणाऱ्यांवर कारवाई करण्यासाठी गेलेल्या महसूल विभागाच्या अधिकाऱ्यांना वाळू माफियांनी थेट आव्हान दिले आहे. महसूल अधिकाऱ्यांनी जप्त केलेले दोन ट्रॅक्टर आणि वाळू, चोरांनी अंधाराचा फायदा घेत आणि ट्रॅक्टरमधील वाळू तिथेच उपसून (खाली करून) पळवून नेल्याची गंभीर घटना घडली आहे. याप्रकरणी चोपडा ग्रामीण पोलीस ठाण्यात गुन्हा दाखल करण्यात आला आहे.
दोन वेगवेगळ्या ट्रॅक्टरवर झाली होती कारवाई
मिळालेल्या माहितीनुसार, ३ जुलै २०२६ रोजी सायंकाळी ६.३० वाजेच्या सुमारास महसूल विभागाचे अधिकारी वढोदा गावात गस्तीवर होते. यावेळी त्यांना दोन ट्रॅक्टर अवैध वाळू वाहतूक करताना मिळून आले:
१) पहिले ट्रॅक्टर: वढोदा गावातील विठ्ठल मंदिराच्या मागील मोकळ्या जागेत विना क्रमांकाचे ‘स्वराज’ कंपनीचे निळ्या रंगाचे ट्रॅक्टर आणि लाल रंगाची टॉली वाळू वाहतूक करताना पकडण्यात आली. यात ५,००० रुपये किमतीची १ ब्रास वाळू होती. हे ट्रॅक्टर इलाम दिनेश बारेला (वय १९) हा चालवत होता. २) दुसरे ट्रॅक्टर: स्मशानभूमीजवळ विना क्रमांकाची टॉली असलेले ‘सोनालिका’ कंपनीचे निळ्या रंगाचे ट्रॅक्टर (क्रमांक MH.19.EA.3872) अवैध वाळू वाहतूक करताना पकडण्यात आले. यातही ५,००० रुपये किमतीची १ ब्रास वाळू होती.
दोन्ही ट्रॅक्टर आणि वाळू असा एकूण ८,१०,००० (आठ लाख दहा हजार) रुपयांचा मुद्देमाल महसूल अधिकाऱ्यांनी जप्त केला होता.
अंधाराचा फायदा घेत ट्रॅक्टर केले लंपास
कारवाई सुरू असतानाच, पहिल्या ट्रॅक्टरचा चालक इलाम दिनेश बारेला याने हुशारी करत हेडलाईट सुरू न करता, रिव्हर्स गिअरचा वापर करून अंधाराचा फायदा घेतला आणि ट्रॅक्टर पळवून नेले.
दुसऱ्या ट्रॅक्टरचा चालकही ट्रॅक्टरमधील वाळू तिथेच खाली करून पळवून गेला. महसूल अधिकाऱ्यांनी त्याचा पाठलाग केला असता, टॉलीमध्ये थोडी वाळू शिल्लक असताना त्यांनी त्याचे फोटो काढले. चौकशीअंती हे ट्रॅक्टर किशोर लक्ष्मण कोळी (रा. वढोदा) याच्या मालकीचे असल्याचे निष्पन्न झाले. अधिकारी तिथे उपस्थित असतानाच ट्रॅक्टर मालक किशोर कोळी आणि त्याचा साथीदार आकाश पंढरीनाथ कोळी हे तिथे आले आणि त्यांनी ते ट्रॅक्टर बळजबरीने पळवून नेले.
महसूल अधिकाऱ्याची पोलिसांत धाव
या सरकारी कारवाईत अडथळा आणून जप्त केलेला मुद्देमाल पळवून नेल्याप्रकरणी महसूल अधिकारी फिर्यादी संतोष शालीग्राम कोळी (वय ४९, व्यवसाय- नोकरी, रा. वाल्मिक नगर, चोपडा) यांनी ४ जुलै रोजी मध्यरात्री १२.३८ वाजता चोपडा ग्रामीण पोलीस ठाण्यात तक्रार दिली.
त्यांच्या फिर्यादीवरून आरोपी १) इलाम दिनेश बारेला, २) आकाश पंढरीनाथ कोळी, आणि ३) ट्रॅक्टर चालक/मालक किशोर लक्ष्मण कोळी (सर्व रा. वढोदा, ता. चोपडा) यांच्याविरुद्ध भारतीय न्याय संहिता (BNS) २०२३ च्या कलम ३०३(२) आणि महाराष्ट्र जमीन महसूल अधिनियम १९६६ चे कलम ४८(७), ४८(८) प्रमाणे चोरीचा गुन्हा दाखल करण्यात आला आहे.
या गुन्ह्यात अद्याप आरोपींना अटक करण्यात आलेली नाही. चोपडा ग्रामीण पोलीस ठाण्याचे पोलीस निरीक्षक संजय सोनवणे यांच्या मार्गदर्शनाखाली पोलीस हेड कॉन्स्टेबल हेमंत मोहन कोळी पुढील तपास करत आहेत.
