लिथियम-आयन बॅटरी चार्जिंगदरम्यान आग लागल्याचा प्राथमिक अंदाज; रहिवाशांचे एलपीजी सिलेंडर सुरक्षित बाहेर काढल्याने मोठी दुर्घटना टळली
जळगाव (प्रतिनिधी) :- जळगाव शहरातील शिव कॉलनी परिसरातील गुरुकृपा क्लासेसजवळ असलेल्या गुंजन अपार्टमेंटच्या तळमजल्यावरील ‘परिवर्तन इलेक्ट्रिक बाईक सर्व्हिसिंग सेंटर’ या दुकानाला शुक्रवारी (३ जुलै) दुपारी सुमारे २.५९ वाजता भीषण आग लागली. इलेक्ट्रिक स्कूटरच्या लिथियम-आयन (Li-ion) बॅटरीचे चार्जिंग सुरू असताना आग लागल्याचा प्राथमिक अंदाज व्यक्त करण्यात आला आहे. अग्निशमन दलाच्या तत्परतेमुळे अवघ्या २० मिनिटांत आग आटोक्यात आली आणि संभाव्य मोठी दुर्घटना टळली.
दुकानाचे मालक निखिल संजय जाधव असून इमारतीच्या मालक सौ. संगीता राजेंद्र पाटील आहेत. आगीत इलेक्ट्रिक स्कूटरसाठी वापरण्यात येणाऱ्या लिथियम-आयन बॅटऱ्या तसेच सर्व्हिसिंगसाठी लागणारे विविध साहित्य जळून खाक झाले.
फोमच्या सहाय्याने विझवली आग
लिथियम-आयन बॅटरीमुळे आग अधिक धोकादायक स्वरूपाची असल्याने अग्निशमन दलाने प्रथम पाण्याचा मारा करून त्यानंतर फोमचा वापर करत आग पूर्णपणे विझवली. घटनास्थळी अग्निशमन दलाच्या तीन फायर फायटर गाड्या दाखल झाल्या असून त्यापैकी दोन गाड्यांच्या सहाय्याने आग नियंत्रणात आणण्यात आली.
एलपीजी सिलेंडर बाहेर काढून टळला मोठा अनर्थ
आग तळमजल्यावरील दुकानात लागल्याने वरच्या मजल्यावरील रहिवाशांच्या घरातील एलपीजी सिलेंडर तातडीने सुरक्षित बाहेर काढण्यात आले. वेळेवर केलेल्या या उपाययोजनांमुळे मोठा स्फोट किंवा जीवितहानी टळल्याचे अग्निशमन विभागाने सांगितले.
अग्निशमन दलाची तत्पर कामगिरी
मुख्य अग्निशमन अधिकारी अश्वजीत घरडे आणि उपअग्निशमन अधिकारी भारत बारी यांच्या मार्गदर्शनाखाली बचावकार्य राबविण्यात आले.
या मोहिमेत वाहनचालक देविदास सुरवाडे, प्रभाकर पाटील, गोविंद सोनवणे तसेच फायरमन रोहिदास चौधरी, तेजस जोशी, रजनीश भावसार, सत्तार तडवी, सुमित साबळे, यश मनोरे, नवल शंकरपाळ, ललित पाटील, दीपक रांधडे, रितेश उबाळे, वृषभ सुरवाडे आणि रवींद्र सपकाळे यांनी शर्थीचे प्रयत्न करून आग आटोक्यात आणली.
“लिथियम-आयन बॅटरीमुळे आग अधिक धोकादायक होती. योग्य पद्धतीने फोमचा वापर करून अवघ्या २० मिनिटांत आग नियंत्रणात आणण्यात आली. त्यामुळे मोठी दुर्घटना आणि संभाव्य जीवितहानी टळली.”
— अश्वजीत घरडे,
मुख्य अग्निशमन अधिकारी, जळगाव.
