अवघ्या २४ तासांत फत्तेपूर पोलिसांची कारवाई
फत्तेपूर (प्रतिनिधी) :- जामनेर तालुक्यातील मादणी शिवारातील शेतांमधून मोटार व सोलर संचाच्या वायरी चोरी करणाऱ्या दोघा आरोपींना फत्तेपूर पोलिसांनी अवघ्या २४ तासांत अटक केली आहे. या प्रकरणी भारतीय न्याय संहिता (बीएनएस) कलम ३०३(२) अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, ३० जून रोजी सायंकाळी ६ ते १ जुलै रोजी सकाळी ८.३० वाजेदरम्यान मादणी शिवारातील विविध शेतांमधून विहिरीच्या मोटारी, बोअरवेल आणि सोलर संचाच्या विद्युत वायरी अज्ञात चोरट्यांनी चोरून नेल्या. या चोरीत एकूण १६ हजार ४०० रुपयांचे नुकसान झाले.
या प्रकरणी सोपान पंडित पाटील (रा. मादणी, ता. जामनेर) यांच्या फिर्यादीवरून फत्तेपूर पोलीस ठाण्यात गुन्हा क्रमांक १४२/२०२६ दाखल करण्यात आला.
तपासादरम्यान पोलिसांनी शेख साकीब शेख इरफान (वय १८, रा. तोंडापूर, ता. जामनेर) आणि समीर साबीर कुरेशी (वय २५, रा. शिवना, ता. सिल्लोड, जि. छत्रपती संभाजीनगर) या दोघांना अटक केली.
तपासात आरोपींनी फिर्यादी तसेच इतर शेतकऱ्यांच्या शेतातील बोअरवेल, विहिरीच्या मोटारी आणि सोलर संचाच्या विद्युत वायरी परस्पर संमतीशिवाय चोरी केल्याचे निष्पन्न झाले आहे.
ही कारवाई फत्तेपूर पोलीस ठाण्याचे सहाय्यक पोलीस निरीक्षक अंकुश जाधव यांच्या मार्गदर्शनाखाली करण्यात आली. पुढील तपास पोलीस कर्मचारी प्रवीण चौधरी करीत आहेत.
