जळगाव, प्रतिनिधी)- गिरणा नदीपात्रातून अवैधरित्या वाळूचे उत्खनन करून खेडी खुर्द शिवारातून चोरटी वाहतूक करणाऱ्यांविरुद्ध तालुका पोलिसांनी मोठी कारवाई केली आहे. या कारवाईत ट्रॅक्टर, ट्रक, डंपरसह सुमारे १७ लाख ५० हजार रुपयांचा मुद्देमाल जप्त करण्यात आला असून सात जणांविरुद्ध गुन्हा दाखल करण्यात आला आहे.
गुरुवारी रात्री साडेदहा वाजेच्या सुमारास खेडी खुर्द (ता. जळगाव) शिवारातील गिरणा नदीपात्रातून अवैध वाळू वाहतूक सुरू असल्याची गोपनीय माहिती तालुका पोलिसांना मिळाली होती. त्यानुसार पोलीस निरीक्षक शशिकांत पाटील यांच्या मार्गदर्शनाखाली पोलिसांचे पथक घटनास्थळी दाखल झाले. पोलिसांचे पथक पाहताच चालकांनी कारवाईच्या भीतीने वाहने घटनास्थळीच सोडून पलायन केले. पोलिसांनी घटनास्थळावरून ट्रॅक्टर (एमएच १९ एएन ४४३०), डंपर (एमएच १९ झेड २७९४), डंपर (एमएच १९ झेड ४२२८), ट्रक (एमएच १९ जे ०३१०), डंपर (एमपी ०४ जीए २१८८) आणि डंपर (एमएच १९ सीडब्ल्यू ३६३६) अशी एकूण १७ लाख ५० हजार रुपयांची वाहने व मुद्देमाल जप्त केला.
या प्रकरणी सतीश कुंभार (रा. प्रजापतनगर), गणेश कोळी (रा. कानसवाडा), अब्दुल करीम शेख (रा. आव्हाणे), रवींद्र जाधव (रा. वाघनगर), रितेश कोळी (रा. विदगाव), विशाल सपकाळे (रा. कंडारी) आणि भूषण सपकाळे (रा. खेडी खुर्द) यांच्याविरुद्ध तालुका पोलीस ठाण्यात गुन्हा दाखल करण्यात आला असून पुढील तपास पोलीस हवालदार योगेश पाटील करीत आहेत.
