लग्नाचे आमिष दाखवत दोन महिन्यांपासून अत्याचार केल्याचा आरोप
चोपडा (प्रतिनिधी) : चोपडा तालुक्यातील एका गावातील २३ वर्षीय तरुणीवर लग्नाचे आमिष दाखवत वारंवार अत्याचार केल्याचा धक्कादायक प्रकार उघडकीस आला आहे. पीडितेच्या तक्रारीवरून चोपडा ग्रामीण पोलिसांनी आरोपीविरुद्ध बलात्काराचा गुन्हा दाखल केला आहे.
पोलिस सूत्रांकडून मिळालेल्या माहितीनुसार, तालुक्यातील बोरअंजटी परिसरातील पीडित तरुणीची ओळख नागलवाडी येथील भिकन मिस्त्री (पूर्ण नाव उपलब्ध नाही) याच्याशी झाली होती. आरोपीने लग्नाचे आश्वासन देत मागील दोन महिन्यांपासून विविध ठिकाणी तिच्यावर वारंवार अत्याचार केल्याचा आरोप फिर्यादीत करण्यात आला आहे.
१२ जून रोजी रात्री घडलेल्या प्रकारानंतर पीडितेने धाडसाने चोपडा ग्रामीण पोलीस ठाणे गाठून तक्रार दिली. त्यानुसार भारतीय न्याय संहिता कलम ६४ अन्वये बलात्काराचा गुन्हा दाखल करण्यात आला आहे.
घटनेची माहिती मिळताच पोलिसांनी तपासाला सुरुवात केली असून आरोपीचा शोध सुरू आहे. या प्रकरणाचा पुढील तपास पोलीस निरीक्षक महेश टाक यांच्या मार्गदर्शनाखाली सुरू आहे.
या घटनेमुळे परिसरात संतापाची लाट उसळली असून महिलांच्या सुरक्षेचा प्रश्न पुन्हा ऐरणीवर आला आहे.
