लोखंडी धारदार हुकने वार; पती-पत्नीविरुद्ध खुनाच्या प्रयत्नाचा गुन्हा, एक आरोपी अटकेत
भडगाव (प्रतिनिधी) :- जुन्या वादाच्या कारणावरून एका महिलेवर लोखंडी धारदार हुकने जीवघेणा हल्ला केल्याची धक्कादायक घटना भडगाव शहरातील यशवंतनगर परिसरात घडली. या प्रकरणी भडगाव पोलिसांनी पती-पत्नीविरुद्ध खुनाच्या प्रयत्नाचा गुन्हा दाखल केला असून एका आरोपीला अटक करण्यात आली आहे.
पोलिसांनी दिलेल्या माहितीनुसार, १२ जून रोजी रात्री सुमारे ९ वाजेच्या सुमारास यशवंतनगर येथील अस्लम बिस्मिल्ला शेख व त्याची पत्नी शमीम अस्लम शेख यांनी जुन्या वादातून कविताबाई सुरेश पाटील यांना शिवीगाळ व मारहाण केली. त्यानंतर अस्लम शेख याने कविताबाईंना घरात ओढून नेत लोखंडी धारदार हुकने त्यांच्या गळ्याजवळ व शरीरावर दोन ते तीन वार केल्याचा आरोप आहे.
या हल्ल्यात कविताबाई गंभीर जखमी झाल्या असून त्यांना उपचारासाठी रुग्णालयात दाखल करण्यात आले. जखमी महिलेची सून राधा सागर पाटील (वय २३, रा. यशवंतनगर, भडगाव) यांनी दिलेल्या फिर्यादीवरून भडगाव पोलीस ठाण्यात गुन्हा दाखल करण्यात आला आहे.
पोलिसांनी भारतीय न्याय संहिता कलम १०९(१), ११५(१), ३५२ व ३(५) अन्वये गुन्हा नोंदविला आहे. या प्रकरणातील महिला आरोपी शमीम अस्लम शेख हिला अटक करण्यात आली असून न्यायालयासमोर हजर केल्यानंतर तिला न्यायालयीन कोठडी सुनावण्यात आली आहे. तर मुख्य आरोपी अस्लम शेख याच्याविरोधात पुढील तपास सुरू आहे.
या घटनेमुळे भडगाव शहरात खळबळ उडाली असून पोलीस निरीक्षक राहुल पवार यांच्या मार्गदर्शनाखाली पोलीस उपनिरीक्षक सुशील सोनवणे अधिक तपास करीत आहेत.
