जळगाव (प्रतिनिधी):- जळगाव शहरातील चंदूअण्णा नगर चौक परिसरात अल्पवयीन मुलांकडून काम करून घेत त्यांच्या आर्थिक शोषणाचा प्रकार उघडकीस आला आहे. या प्रकरणी दोन गॅरेज चालकांविरुद्ध तालुका पोलीस ठाण्यात गुन्हे दाखल करण्यात आले आहेत.मिळालेल्या माहितीनुसार, केजीएन ऑटो गॅरेजचा मालक अरबाज खाटीक याने १६ वर्षीय मुलाला, तर जय बजरंग ऑटो गॅरेजचा मालक रोहित पाटील याने १३ वर्षीय बालकाला कामावर ठेवले होते.
या दोन्ही अल्पवयीन मुलांकडून सकाळी ९ ते सायंकाळी ५ वाजेपर्यंत काम करून घेतले जात होते.विशेष म्हणजे, दिवसभराच्या कामाच्या बदल्यात त्यांना केवळ २०० रुपये मजुरी दिली जात असल्याचे तपासात समोर आले आहे. संबंधित यंत्रणेकडून करण्यात आलेल्या कारवाईत दोन्ही बालकांची सुटका करण्यात आली.या प्रकरणी बालमजुरी प्रतिबंधक कायद्यानुसार संबंधित गॅरेज चालकांविरुद्ध तालुका पोलीस ठाण्यात गुन्हे दाखल करण्यात आले असून पुढील तपास सुरू आहे.
