जळगाव शहरातील फुले मार्केट परिसरातील घटना; अज्ञात महिलेविरुद्ध गुन्हा
जळगाव (प्रतिनिधी) :- कर्ज मिळवून देण्याचे आमिष दाखवत एका अज्ञात महिलेने गृहिणीची तब्बल २१ हजार रुपये किमतीच्या सोन्याच्या दागिन्यांची फसवणूक केल्याची घटना जळगाव शहरातील फुले मार्केट परिसरात उघडकीस आली आहे. या प्रकरणी जळगाव शहर पोलीस ठाण्यात अज्ञात महिलेविरुद्ध गुन्हा दाखल करण्यात आला आहे.
याबाबत छाया कमलाकर वाणी (वय ५८, रा. वृंदावन सोसायटी, पिंप्राळा, जळगाव) यांनी फिर्याद दिली आहे. दि. २ मे रोजी दुपारी चार वाजेच्या सुमारास फुले मार्केटमधील गुप्ताजी शेव दुकानासमोरील जिन्याजवळ ही घटना घडली.
फिर्यादीनुसार, एका अज्ञात महिलेने फिर्यादींशी संवाद साधत त्यांना कर्ज मिळवून देण्याचे आमिष दाखवले. त्यानंतर विश्वास संपादन करून महिलेने फिर्यादींकडील तीन ग्रॅम वजनाचे सोन्याचे पदक तसेच पाच ग्रॅम वजनाचे सोन्याचे मणी असलेली पोत घेऊन पोबारा केला. फसवणूक झाल्याचे लक्षात आल्यानंतर फिर्यादींनी पोलीस ठाण्यात धाव घेत तक्रार दिली.
या प्रकरणी भारतीय न्याय संहितेच्या कलम ३१८(४) अन्वये अज्ञात महिलेविरुद्ध गुन्हा दाखल करण्यात आला असून पुढील तपास पोहेकॉ प्रवीण वाघ करीत आहेत.
